Diretor Kilnika Bairo-Pite (KBP), Doutor Daniel Murphy hatete, moras ne’e hanesan virus ka mear iis bo’ot ne’ebe mak hanesan moras busa nian.
“Iha Klinika Bairo-Pite ne’e moras bronchiolitis afeta ba labarik nain lima ne’ebe mak dadaun ne’e baixa hela iha klinika ne’e,” dehan Diretor KBP, Doutor Daniel Murphy, iha Bairo-Pite, Dili.
Doutor Dan esplika, sintomas husi moras bronchiolitis mak hanesan mear nunka para, ulun fatuk moras no dala ruma mos iss bo’ot.
Entretantu tuir membru Komisaun F (saude no edukasaun), Deputadu Eladio Faculto katak, moras bronchiolitis ne’e moras perigozu wainhira afeta ba joventude sira, liu-liu labarik idade ki’ik ne’ebe kondisaun isin fraku.
“Tanba ne’e hau hanoin ita nia klinika ka ospita ne’ebe mak halo tratamentu ba moras sira ne’e tenke fo tratamentu e atensaun bo’ot ba ita nia maluk sira ne’ebe mak afeta moras bronchiolitis ne’e,” sujere Deputadu Faculto.
Deputadu ne’e hatutan, moras bronchiolitis ne’e hanesan moras kontazioza ida tanba moras ne’e bele implika fali ba moras Tuberculose (TBC).
