“Governu iha knar bo’ot ida, ne’ebe hau kontinua husu sei bele karik halo rehabilita ba estrada ne’ebe maka kuak tanba kauza husi udan,” sujere Deputadu Mateus de Jesus, (25/02), iha Parlamentu Nasional.
Tuir nia, ne’e importante atu nune’e taxista no motorist sira bele halo’o sira nia movimentu ho diak, ne’e kestaun ne’ebe maka importante tebes.
“Hanesan taxi badak oan sira tenke fai tun ba kuak sira ne’e, ita hare ida ne’e mos ladun diak,” dehan Deputadu ne’e.
Nia mos sujere, Ministeriu Obras Publiku (MOP) mos bele rehabilitasaun estradas sira iha distritu sira ne’ebe kuak ka at, atu nune’e bele balansu no komunidade hotu-hotu bele senti iha mundansa.
Hatan ba kestaun ne’e Engeneering Estrada Ministeriu Obras Publiku (MOP), Jose Agostu katak, iha tinan kotuk (2012) Kompania Estrada Bo’ot maka halo rehabilitasaun ba Estrada sira iha Dili laran.
“Agora at fali, kompania iha responsabilidade atu hadia fila fali,” dehan Engeneering Estrada ne’e.
Nia informa, estrada ne’ebe maka at kauza husi udan maka, iha Tibar no iha Bairo-Pite, e iha Bairo-Pite agora dadaun kompania halo hela servisu.
“Iha Bairo-Pite ne’e sira tau ona bees cross, berarti sira hadia dadauk, enkuantu iha Tibar sei hadai iha fulan Marsu nia laran,” dehan Engeneering Agusto.
