Tuir planu fundu ne’e sei apoiu Judisial System Monitoring Program (JSMP) nia Unidade Justisa ba Feto ba programa atu hasae asesu feto nian ba sistema justisa formal.
“Apoiu finanseiru ne’e nu’udar komitmentu boot ne’ebé Governu Noruegia investe ba seitór justisa Timor-Leste nian, liu-liu ba promosaun direitu feto no asesu feto ba sistema justisa formál,” dehan Luis de Oliveira Sampaio, Diretór Ezekutivu JSMP.
Ho apoiu ne’e JSMP sente orgullu no agradese ba Governu Noruegia ho ninia apoiu iha seitór justisa ne’ebé nu’udar pilar importante ida iha nasaun direitu demokrátiku e fiar katak apoiu ne’e bele kontinua hametin liu tan servisu JSMP nian iha area prevensaun no komitmentu atu kombate kazu violénsia bazeia ba jéneru iha sosiedade Timor-Leste.
Nia dehan, fundu ne’e sei kobre ba atividade monitorizasaun iha tribunál sira, desiminasaun informasaun no treinamentu ba lider komunidade feto iha area rurál no estudante sekundária feto kona-ba Lei Kontra Violénsia Doméstika, Kódigu Penál no Prosesu Penál husi perspetiva jéneru.
Antes ne’e, iha Janeiru 2009 to’o Novembru 2012, Governu Noruegia mos investe ona orsamentu atu apoiu programa asesu feto ba justisa ho montante US $ 560,266.00.
Iha lidun seluk Deputadu Arao Noe hateten, ne’e nudar factor positivu ida, hodi bele ajuda JSMP hodi hala’o sira nia programa iha area judisial ho diak liu tan.
“Ne’e bele ajuda sira hodi hala’o sira nia programa iha area monitorizasaun, iha area rural, tanba ita nudar nasaun foun justisa ita nian laos fraku maibe tanba elementus justisa maka sei menus, ne’e duni persija apoiu maka’as husi NGO sira,” dehan Deputadu Noe.
Tuir nia, wainhira Governu no NGO Nasional hanesan JSMP sira koopera hamutuk hodi bele dezenvolve justisa diak liu tan iha rai laran, nune’e populasaun sira labele halerik kona ba sistema iha Timor-Leste.
