“Orsamentu mil e sete sentus tal ba uza ba funsionamentu administrasaun ninian, enkuantu ba capital dezenvolvementu mais umenus 30 ou 40 etal pursentu deit hanesan ne’e,” lamenta Deputadu Mateus de Jesus, (10/01), iha Parlamentu Nasional.
Nia konsidera, ida ne’e sistema alokasaun orsamentu ne’ebe la diak no la justu tanba aloka la’os atu hamenus kiak maibe aumenta.
Entretantu Vise Prezidenti Parlamentu Nasional, Deputadu Aderito Hugo hateten, alokasaun OJE ba capital dezenvolvementu ba linha ministerial ki’ik duni maibe hare capital dezenvolvementu ho fundu infrastrutura ninian ne’e orsamentu bo’ot tebes.
“Mais metade husi no total orsamentu inklui husi parseiru dezenvolvementu, apoiu doadores sira nian barak liu ba infrastrutura,” Vise PN ne’e katak.
“Entaun aumenta sira ne’e kuaze um biliaun de dolares ne’e ba los deit ho karakter kapital dezenvolvementu,”Deputadu ne’e dehan.
Tuir nia, capital dezenvolvementu iha laran iha area rua,ida mak linha ministerial ninian ho karakter kapital dezenvolvementu no iha mos fundu infrastrutura nian.
