“Hau hanoin laboratorium tenke halo teste didiak ba bee aqua ne’e antes espailha iha merkaduria,” sujere Membru Komisaun F, Deputadu Leonel Marcal, (11/01), iha Parlamentu Nasional.
Maske husi komisaun rasik seidauk halo fiskalizasaun ida ba iha produsaun bee aqua mor ne’e maibe nia dehan, bee ne’e laiha kualidade.
“Ami consume ona bee aqua ne’e maibe la diak e ami soe fali, tanba ne’e iha tempu badak ami sei halo fiskalizasaun ba fatin produsaun bee aqua sira ne’e,” dehan Deputadu husi bankada Fretilin ne’e.
Entretantu Diretor Toxicologia Laboratorium Nasional, Pedro Almeida hateten sira bele halo teste ba produsaun bee aqua mor ne’e maibe problema mak kompania ne’e hetan ona karta lisensa negosiu nian husi Ministeriu Komersiu Industria (MKIA).
“Ami labele fo sai rezultadu analisa nian, tanba ministeriu komersiu industria fo sai uluk ona karta lisensa,” dehan Diretor LabNas, Almeida.
Alende ne’e, nia afirma, sira nia parte labele kontrola ba produsaun bee aqua ho diak tanba laiha transporte.
