Tuir Diretora Nasional Saude Komunitaria, Isabel Maria Gomes katak labarik falta vitamina no lumbringa fasil afeta mal nutrisaun no fo impaktu ba sira nia dezenvolvementu kakutak.
“Ami implementa programa distribuisaun vitamina A no aimoruk aumenta ran nian inklui mos aimoruk lumbringa tanba bainhira labarik ida iha nia isin iha lumbringa, sei fo efeitu ba labarik nia isin no bele afeta mal nutrisaun,” dehan Diretora Nasional Saúde Komunitaria, Gomes, (10/01), bainhira lansa kampanha Global Labarik Hamlaha no Mal nutrisaun, iha Catholic Relief Service (CRS), Mandarin, Dili.
Alende ne’e, MS mos sei halo advokasia hasa’e konsiensia komunidade sira, liu-liu ba inan sira oinsa mak bele produs aihan ne’ebe mak ho kualidade no fo nutrisaun diak ba oan sira.
Tuir rezultadu Demografy Health Survey iha tinan 2009-2010 hatudu katak kazu mal nutrisaun iha Timor-Leste as, iha tipu klasifikasaun tolu hanesan kalsifikasaun labarik ho kondisaun badak hamutuk 58 %, krekas hamutuk 19% no todan menus hamutuk 44 %.
Entretantu Anastasia da Costa, nudar inan ida sente preokupa ho distribuisaun batar ut iha fasilidade saude balun nakonu ho interese individual.
“Hau nia observasaun durante ne’e hare katak hahan sira ne’ebe ministeriu distribui ne’e dala barak interese individu mak domina, familia ida nia membru ida sai hanesan pesoal , iha kotuk nia simu hela deit batar ut maibe sira ne’ebe merese simu, la simu nafatin tanba la iha familia iha laran,” Inan da Costa ne’e kritika.
Tanba ne’e nia husu ba MS atu tau atensaun ba attitude hanesan ne’e, tanba ema hotu iha direitu hanesan,liu-liu sira ne’ebe mal nutrisaun atu simu aihan ne’e nune’e bele rekopera hikas sira nia saude, la’os deit familia,” tenik Inan da Costa.
