Hafoin akontesementu estudante husi eskola Ensino Baziku (EB) Sub-distritu Lospalos nain 63 invenenadu (keracunan) hafoin konsumu aihan husi merenda eskolar, to’o agora komunidade sira iha fatin ne’e sei trauma no kuidadu an bainhira han aihan ruma.
“Povu hotu-hotu komesa tauk,haruka sira nia oan ba sosa sasan ruma iha kios mos sira komesa tauk hotu,” dehan Deputadu ozorio Florindo, iha Parlamentu Nasional.
Tanba ne’e tuir nia, atu labele akontese tan iha futuru, hotu-hotu tenke konsensu, hanoin ida atu nune’e bele kombate krime organizadu hanesan ne’e.
Iha fatin hanesan Prezidenti Komisaun F, Deputadu Virgilio Hornai konsidera kazu ne’e seriu no grave e tenke toma atensaun.
“Ita bele hateten krime organizadu tanba ita nia alunus hamutuk 63 pessoas, nain 10 mak sira halo tratamentu deit iha uma, enkuantu nain 53 lori ona ba ospital, nain rua lori mai Dili, restu rekopera, ida mak sei iha ne’e,” dehan Deputadu Hornai.
Deputadu ne’e dehan, nia iha sampel tipu veneno ne’ebe halo estudante sira keracunan ne’e no entrega ona ba iha Ministeriu Saude atu halo teste iha laboratorium.
“Sampel ba veneno ka aimoruk ne’e hau iha, hau tau hela iha kareta laran no hau telefone ona ba Vise Ministra foti para teste iha laboratorium hodi nune’e bele hatene aimoruk ne’e nia gravidade to’o iha ne’ebe,” Deputadu ne’e katak.
Deputadu ne’e sujere, ba futuru presiza aumenta tan numeru servisu intelijensia ninian atu nune’e bele identifika krime organizadu sira hanesan ne’e.
