Hafoin hetan teoria iha Universidade Nasional Timor-Lorosa’e durante tinan rua ho balun, Estudantes husi Faculdade Medisina no Siensia da Saúde Departamentu Enfermagem no Parteira hamutuk nain 285 agora hahu halo estajiu iha Fasilidade Saude sira hodi aplika saida mak sira hetan durante iha eskola.
“Ami husu para sira atu bele aproveita tempu ne’e ho masimu atu aplika sira nia matenek ne’ebe sira hetan iha kadeira universidade iha fasilidade saúde, hodi nune’e sira bele iha esperiensia no konesementu ne’ebe ita hakarak ita nia pesoal saúde sira atu hetan iha futuru,” dehan Dekanu Faculdade Medisina e Siensia Saúde, Doutor João Martins, iha serimonia Capping Day, iha Hotel Timor, Dili.
Programa halo estajiu ne’e hanesan parte ida husi prosesu aprendizajen (teoria) tanba ne’e husu ba sira atu aproveita didiak oportunidade ida ne’e, hodi aumenta sira nia matenek no konesementu klean kona ba sira nia profisaun nudar Pesoal Saude iha futuru.
“Ami espera katak sira bele utilize momentu importante ida ne’e katak sira iha ona konesementu sufsiente atu hala’o sira nia pratika iha fasilidade saúde no liu husi serimonia Capping Day ne’e ami fo ona knar ida ba sira,” Doutor Martins esperansa.
Estudantes 282 ne’e sei halo estajiu iha Sentru Saúde, Ospital Referal sira iha teritoriu tomak inklui mos Ospital Nasional e tuir orariu sira sei halo pratika fulan ida depois fila fali ba universidade aprende tan teoria depois ba pratika tan.
Iha parte seluk Estudantes husi Departamentu Parteira, Lucinda da Conçeicão dehan estajiu hanesan odamatan ba sira nudar Pesoal Saúde atu prepara sira nia an hodi sai profesional atu servi povu Timor-Leste iha futuru.
“Tanba ne’e ho kondisaun no situasaun saida deit ami prontu atu ajuda buat ne’ebe ami sente katak ami bele ajuda, liu –liu ba inan sira no oan sira ne’ebe ami sei hasoru iha sosiedade,” Estudante Lucinda promete.
Entretantu tuir Estudantes husi Departamentu Emfermagen, Hermina Vitoria Neto katak estajiu importante tebes ba sira atu kompleta sira nia kursu tanba sira bele aplika matenek ne’ebe sira hetan iha kadeira universidade durante ne’e.
“Ami prontu atu bele ajuda liu husi programa ida naran promosaun, rehabilitasaun, prevensaun ba moras sira ne’ebe akontese iha rai laran, ami nudar departamentu emfermagen ami hakarak tebes atu ajuda ema moras sira tanba ami nia knar nudar Pesoal Saúde ida,” dehan Estudante Neto.*
