Iha 19 Outubru 2012 Tribunál Distritál Baucau lee akordaun ba arguidu inisial DB ba pena tinan 9 fulan 6 prizaun ba krime abuza seksuál ba menór. Tribunál prova Ministériu Públiku nia akuzasaun katak arguidu prátika abuzu seksuál hasoru vítima menór ne’ebe mak nu’udar nia oan rasik.
Ministériu Públiku akuza katak arguidu prátika abuzu seksuál hasoru vítima ne’ebé nia oan rasik, ho forma ameasa ne’ebé akontese iha 14 Outubru 2012, iha Suku Aubeon Sub-Distritu Natarbora, Distritu Manatuto. Ministériu Públiku akuza arguidu tuir artigu 177 Kódigu Penál (abuzu seksuál ba menór). Krime ne’e iha sentensa másimu tinan 20 iha prizaun.
“JSMP enkoraja tribunál aplika pena ne’ebé tuir krime nia gravidade. Insestu maka krime ne’ebé ofende tebetebes valores sosiál, morál no relijioza, no bele halo prejuizu fíziku, psikolójiku no emosionál ne’ebé grave tebetebes ba vítima. Tanba ne’e presiza pena atu fó efeitu disuasivu ba arguidu no enjeralmente fó mensajen ba komunidade atu evita krime insestu iha futuru,” dehan Diretór Interinu Judycial Sistem Monitoring Program (JSMP), Casimiro dos Santos, foin lalais, iha Dili.
Juíz Ângela Faria Belo mak reprezenta tribunal koletivu iha julgamentu ne’e hodi lee akordaun ba arguidu, reprezentante husi Ministériu Públiku Pascasio de Rosa Alves no arguidu akompaña husi advogada Estajiariu Muzaria Amaral.
Entretantu Deputada Josefa Alvares Soares katak, ne’e desizaun ne’ebe maka diak no tuir duni salah ne’ebe maka arguidu halo.
“Ne’e asaun ne’ebe maka la diak no desizaun ne’ebe maka juis sira foti ne’e apar duni ho kazu ne’ebe maka nia [Arguidu] halo ne’e,” Deputada Soares apoia.
Tuir nia, Komunidade iha Teritoriu tomak presiza iha konesementu kona ba Asaun Insestu ne’e atitude ne’ebe maka la diak no presiza halakon.
“Governu tenke iha programa ida, oinsa fo formasaun ba ita nia komunidade sira atu bele iha konesementu kona ba asaun insestu, pur ezemplu nia impaktu ne’e saida no halo hahalok hanesan ne’e saida maka sei akontese ba sira, atu nune’e sira bele iha konsiensia atu labele halo tan hahalok hanesan ne’e” tenik Deputada ne’e.
