Hafoin Pesoal Saude (PS) kuaze dois mil ameasa atu halo greve hodi hapara fo asistensia saude ba komunidade sira, Governu liu husi Ministeriu Saude (MS) promete sei halo pagamentu ba sira nia rejime espesial iha fulan Outubru ne’e.
“Ami husu atu bele halo prosesu dadaun ona ba pesoal sira ne’ebe iha ona dokumentus kompletu,bele halo pagamentu iha fulan ne’e nia laran, ba sira ne’ebe sei iha komplikasaun ministerio sei nakloke nafatin atu responde ba iha segundu faze ita sei buka maneira forsa masimu iha fulan Dezembru ne’e prosesu hotu tenke la’o kompletu ona atu halo pagamentu kompletu,” dehan Vise Ministra Saúde asuntu Gestao, Apoiu e Recursu, Maria do Céu Sarmento Pida da Costa, foin lalais, bainhira hala’o enkontru ho Pesoal Saúde iha HNGV, Bidau, Dili.
Vise Ministra rekonese katak, prosesu pagamentu ba PS sira la’o tarde duni tanba desde tinan 2010 e promulga iha Marco 2012, presiza halo analiza ne’ebe klaru ba sira nia dokumentus.
Tanba ne’e Vise Ministra lori governu nia naran husu ba Pesoal Saúde sira atu kompriende prosesu ne’ebe la’o e governu laiha intensaun atu halakon osan ne’ebe pesoal saúde sira nia direitu.
Entretantu Reprezentante Povu iha Parlamentu, Deputada Ilda Maria da Conceição hateten ezijensia ne’ebe PS sira halo ne’e direitu sira nian, maibe sira labele abandona pasiente.
“Hau hanesan komisaun F anterior hamutuk fali ho komisaun ida agora ami sei halo akompanhamentu nafatin to’o pesoal saúde sira hetan ona sira nia direitu iha kultu prazu tanba informasaun ne’ebe sira (governu ) fo sei tama iha vensimentu fulan Outubru ami sei eziji atu halo pagamentu lalais tanba Pesoal Saúde sira hanesan segundu Maromak,” dehan Deputada ne’e.
