Klinika Simões Celas ne’ebe estabelese iha fulan Agostu tinan ida ne’e, ho objetivu atu fo atendimentu ba pasiente sira ho moras oi-oin hanesan suku kanek, konsulta inan isin rua ne’ebe ho kualidade no lais liu.
“Ami iha klinika ne’e simu konsulta jeral ka moras hotu-hotu bele labarik, adultu no inan isin rua sira karik iha pasiente presiza espesialidade atu atende, ami sei halo rujukan ba iha ospital nasional atu espesialidade sira mak atende,” dehan Doutora Milesia Rames, foin lalais, iha Matadouru, Dili.
Doutora ne’e introdus katak, Klinika foun ne’e iha sala rua, sala konsulta no sala emfermaria ou observasaun ba saúde pasiente nian durante oras walu nia laran, pasiente presiza baixa sira halo rujukan ba Ospital Nasional tanba sira iha koperasaun servisu ho sira.
“Hanesan klinika foun durante fulan Agostu no Setembru iha pasiente hamutuk nain 80 mak halao konsulta iha klinika ne’e ho moras oi-oin maioria ho moras ISPA tanba tempu bailoron,” tenik Doutora ne’e.
Iha mos kustu ne’ebe diferente entre pasiente Timor oan $4 no $12 ba pasiente estranjeiru, e sira mos iha planu atu loke tan klinika nehan ne’ebe kompleta ho laboratorium.
Entretantu Xefe Sentru Saúde Bairo Formosa (SSF), Jaime Ximenes Belo hateten durante fulan Agostu no Setembru moras Infesaun Respiratoriu (ISPA) afeta no rejistu maka’as iha Sentru Saude iha teritoriu tomak inklui klinika privadu sira.
“Iha fulan Agostu to’o Setembru moras ne’ebe registu as liu iha Sentru Saúde Formosa mak moras ISPA, la’os fulan Agostu deit maibe kuaze fulan-fulan tanba Sentru Saúde Formosa nia area iha capital laran ne’ebe nakonu ho rai rahun,” dehan Xefe Belo.
Alende moras ISPA iha mos moras seluk ne’ebe afeta ba labarik minoridade sira hanesan moras Kulit,Malaria, Tee been no seluk tan.
