Atu atrai pasiente sira ne’ebe baixa iha Ospital Nasional Guido Valadares (HNGV) han barak, Peritu Nutrisaun husi Ospital ho Ekipa Peritu husi Kompania Caimalioqui (kompania ne’ebe fornese hahan ba pasiente sira iha opsital) halo observasaun ba kualidade hahan ne’ebe pasiente sira han lor-loron.
“Ami iha ne’e prepara mos hahan ne’ebe lor-loron tein han hotu kedas, aban fali sosa fali foun tanba modo tahan hotu iha nutrisaun no kualidade, bainhira hahan ne’e fresku ezemplu na’an karau tenke sosa ida foin oho, la’os ida horseik nian ne’e la iha kualidade, entaun soe tiha labele uza,” dehan Xefe Unidade Nutrisaun HNGV (ahli gizi-Indo), João Quintao, iha Bidau, Dili.
Xefe Unidade Nutrisaun ne’e dehan, maneira ne’ebe sira uza hodi tein lor-loron ba pasiente sira tein tuir menu ne’ebe ahli gizi sira prepara ona, hanesan dader han manu tolun ho etu, no meudia tenke han na’an ou ikan.
“Pasiente sira ne’ebe baixa iha HNGV liu-liu sala 12 kada loron ida han dala lima, hanesan tuku 7:00 dader matabisu han etu ho modo, tuku 10:00 hemu susu been no paun, tuku 12:00 han etu ho modo, tuku 3:00 lokraik snack no tuku 8:00 kalan han etu ho modo,” Xefe Jose esplika.
Nia informa, atividade fo hahan ba pasiente sira tanba servisu diak entre governu liu husi Ministeriu Saúde no Kompania Caimalioqui inklui kozineirus nain 34, e sira fahe ba grupu tolu, grupu ida feriadu ida seluk, tama dader no ida seluk fali tama lokraik.
Entretantu Pasiente baixa HNGV ne’ebe lakohi publika nia identidade, dehan hahan iha ospital kompara ho tinan hirak kotuk, diak liu mak agora dadaun tanba peritu nutrisaun sira uza menu ne’ebe diak tebes atu prepara hahan ne’ebe kualidade ba pasiente sira atu han.
“Hau nia hanoin hahan ne’ebe prepara husi ospital ne’e diak tanba sira tau etu no modo ketak-ketak la kahur malu hanesan tempu uluk maibe dala ruma ami la han familia sira mak han fali ne’e la’os hahan la diak maibe ami nudar pasiente la iha duni vontade atu han,” dehan fontes konfirmadu ne’e.
