Ho realidade ohin loron ema ho moras mental barak mak la’o livre iha Dili laran, Membru Komisaun F Parlamentar husu ba V Governu atu kria fatin ida ba sira ne’e nune’e estadu bele tau matan ba sira ho fasil.
“Hau hanesan membru Komisaun F, ne’ebe trata asuntu saúde nian ami iha idea ida atu fo hanoin ba governu hodi kria rumah sakit jiwa hanesan rai sira seluk, nune’e estadu bele tau matan ba sira ho sira nia kondisoens tomak,” sujere Deputadu Leonel Marçal, foin lalais iha Parlamentu Nasional.
Tuir nia, ida ne’e importante tanba durante ne’e estadu seidauk tau matan ba sira maibe ba deit ema alezadu no idozus sira.
Deputadu ne’e dehan, impaktu husi sofre moras mental ne’e iha fator oi-oin iha balun tanba keturunan, trauma durante funu no seluk tan.
Entretantu Espesialista Psikolojia, Doutor Gaspar Quintão hateten maske governu seidauk hari fatin ida ba ema moras mental maibe iha ona sentru ida ne’ebe oferese husi Organizasaun internasional Sao Joao de Deus husi Portugal iha Laclubar.
“Sira halo koperasaun ho ami kuandu iha moras ne’ebe grave ( kusta tebes atu kontrola) iha sosiedade no fo ameasa ba nia an rasik hato’o ba emfermeiru saúde mental no ami bele halo referral sira ba iha Laclubar, ne’e mak durante ne’e ami halo,” dehan Espesialista Psikolojia ne’e.
Tuir nia, agora dadaun pasiente referal iha sentru ne’eba kuaze ema nain 50 resin mak baixa,e iha semana rua kotuk iha ema nain neen mak haruka ba iha ne’eba.
