“Pontu devista kakutak nian, ami hanoin barak liu ba inan sira dala ruma inan sira ne’e keta ninia hanoin ne’e afeta ezemplu : ba sira ne’ebe primeira ves partus e partus kleur demais entaun depois partus komesa mosu ona hahalok ne’ebe la hanesan bai-bain abandona, soe no oho bebe, ne’e tanba sira hetan depresaun no sikoja depois partus,” esplika Doutor Espesialista Psikolojia Quintão, iha Bidau, Dili.
Tuir nia, fasil atu feto ida afeta iha nia kakutak depois de partus tanba feto nia hormonal bainhira tun no inbalansu biokimika iha sira nia kakutak la normal.
“Hau pesoalmente hare kazu ne’e sempre mosu, iha inan feto balun entrega oan ba madre sira depois partus ho razaun inresponsabilidade husi mane, karik mos impaktu husi ekonomia uma laran ne’ebe la sufsiente.
Entretantu Vise Prezidente Grupu Feto Parlamentar (GMPTL), Deputada Albina Marçal Freitas, hateten, nudar feto ida nia sente triste tebes ho hahalok ida ne’e, e husu ba Tribunal atu foti desizaun ne’ebe adekuadu ba suspeitu sira.
“Hau hanoin iha kodigu penal hatete momos, iha ona evidensia ne’ebe forte katak ema ida ne’e oho bebe ka ema ida, nia tenke ba hatan iha tribunal no responsabiliza ninia hahalok tanba ne’e krime,” dehan Deputada Freitas.
Kazu inan soe sira nia bebe akontese dala barak ona iha rai laran, hanesan foin lalais akontese iha Distritu Aileu, Suspeitu CM soe nia bebe ba iha sintina laran. “Ne’e kazu ida husi kazu barak ne’ebe akontese ona,” tenik Deputada ne’e.
