Husi total kazus ne’ebe tama no halo rekursu ba iha Tribunal Rekursu (TR) durante ne’e, foin kazus tolu mak hetan ona desizaun final iha TR.
“Kazu sira ne’e pendente husi tinan ida ne’e iha fulan hirak liu ba, maibe foin julga iha fulan Setembru nia laran,” dehan Sekretaria Judisial TR, Maria de Fatima, iha Kaikoli, Dili.
Tuir nia, kazus tolu ne’e mai husi Distritus rua, kazus rua husi Distritu Dili no ida seluk husi Distritu Covalima.
“Kazu ida kona ba pemalsual osan ou halo osan palsu, ne’e mai husi distritu Suai, no ida fali kona ba abuzu seksual minor, ne’e mai husi distritu Dili no ida ikus ne’e kona ba pekulatu mai husi distritu Dili mos,” informa Sekretaria Judisial TR ne’e.
Nia esplika, kazus sira ne’e tarde halo julgamentu, tanba prosesu ne’ebe tama iha ne’e barak no juis sira ne’ebe maka atende kazu ne’e tenke estuda ho diak no presiza tempu ne’ebe naruk.
Entretantu Deputada Ilda Maria da Conceicao hateten, kon ba kazus ne’ebe maka iha kada fulan hetan desizaun talves ida deit ou tolu deit ne’e tanba sira presiza akumula testhamunha sira, atu nune’e desizaun ne’ebe maka juis sira foti ne’e bele los.
“Sira tenke buka evidensia ne’ebe los, e iha kazu barak lori tinan barak atu hetan desizaun, ne’ebe la’os sira iha tribunal maka la esforsu, maibe kazu sira ne’e maka hanesan komplikadu,” dehan Deputada ne’e.
Tuir nia, kazu tolu ne’ebe maka agora dadaun hetan ona desizaun final ne’e, diak tanba ne’e nudar esforsu ne’ebe maka husi parte Tribunal sira halo ona.
