Ministériu Públiku (MP) akuza katak, Arguidu sira involve iha grupu Milisia Besi Merah Putih (BMP) hodi hakotu vítima Francisco Braz no Felix Barreto nia vida. MP dehan Arguidu sira prátika krime kontra umanidade ne’e depois rona rezultadu referendu 1999 ne’ebé hatudu maioria povu Timor-Leste hili ukun rasik aan. Kazu ida ne’e rejista ho Númeru Prosesu: 282/C.Ord/2012/TDD.
Agenda julgamentu ba kazu ida ne’e adia dala tolu durante ne’e, tanba Arguidu ida ho inisiál SdJ la kumpri notifikasaun husi Tribunál Distritál Dili. Ikus mai tribunál hasai mandadu kapturasaun hodi kaptura Arguidu SdJ hodi kumpri prizaun preventive iha Prizaun Becora hodi submete ba prosesu julgamentu.
“Tribunál hatudu komitmentu atu julga kazu krime grave ne’ebé akontese iha tinan 1999 depois de Referendu. Nune’é husu ba parte hotu-hotu atu koopera ho tribunál hodi bele hetan rezultadu di’ak ba kazu hasoru umanidade iha tempu pasadu,”sujere Luis de Oliveira Sampaio, Diretór Ezekutivu JSMP.
Iha tribunál nia oin, Arguidu na’in 3 rejeita maka’as akuzasaun husi Ministériu Públiku. Sira deklara katak sira la ameasa ema ruma no la oho Vítima na’in 2 ne’e. Arguidu sira deklara katak Vítima na’in 2 mate tanba Militár Indonezia mak tiru. Maske nune’e Arguidu ho inisiál MS konfesa katak nia mak sunu uma.
Tuir akuzasaun, pozisaun Arguidu na’in tolu iha BMP iha tinan 1999 hanesan tuir mai: Arguidu inisiál FF iha 1999 nu’udar Xefe Suku nomós Komandante Jerál BMP iha Suku Ulmera-Liquiça; enkuantu Arguidu na’in rua ho inisiál SdJ no FB nu’udar Komandante Seksaun iha Kasaid.
“JSMP espera katak kazu krime grave sira sei kontinua julga atu bele hetan verdade no hatudu duni ba ema hotu-hotu katak justisa la’o duni iha nasaun direítu demokrátiku foun ida ne’e, liu-liu atu fó justisa ba vítima no família vítima ne’ebé hetan sofrementu husi hahalok dezumanu iha pasadu,” tenik Luis de Oliveira Sampaio, Diretór Ezekutivu JSMP.
Julgamentu dirije ho juiz koletivu, Dra. Ana Paula Fonseca, Dr. Paulo Texeira no Dr. Julião Quintas. Ministériu Públiku reprezenta husi Dr. José da Silva husi Eskritóriu Defensória Públiku.
Entretantu Deputadu Arao Noe hateten, ne’e nudar pasu positivu ne’ebe maka diak, tanba komesa halo ona justisa ba ema sira ne’be maka komete krime iha tinan 1999.
“Durante ne’e ema hotu eziji Tribunal Internasional, mais agora ita nia tribual lokal Tribunal Distrital Dili komesa julga ona, ne’e diak,” dehan Deputadu Noe.
Deputadu ne’e mos husu ba Tribunal atu julga hotu ema sira ne’ebe naran tama lista ba krime garve 1999 ne’ebe Tribunal simu ona, nune’e sira ne’ebe sai vitima mos sente kontente no fiar katak justisa iha duni.
