Atu garante partisipasaun feto hodi kompete ho mane sira iha eleisaun munisipiu ne’ebe sei hala’o iha tinan 2015 ho diak liu tan, Sekretaria Estadu Promosaun Igualidade (SEPI) sei kopera ho Ministeriu da Administrasaun Estatal (MAE) halo revizaun ba lei eleitoral nian, tanba lei fo ona dalan ba feto sira oinsa mak bele involve an iha vida politika.
“Ami iha preparasaun ida,e ita bo’ot sira hare hela katak ami servisu hamutuk ho Ministeriu Estatal atu hare fila fali oinsa lei eleitoral ba iha prosesu desentralizasaun, ami espera katak ita sei hare bainhira estabelese ona munisipiu iha distritus,” dehan Sekretaria Estadu Idelta Maria Rodrigues, iha Parlamentu Nasional.
Nia dehan, SEPI hamutuk entidade hotu sei halo sosializasaun ba lei eleitoral ne’ebe iha e optimista katak feto sei partisipa maka’as liu tan iha estrutura munisipiu iha nivel as no mediu. “Tanba feto mos iha kapasidade atu halo planu no programa ba prosesu dezenvolvimentu,” Sekretaria Estadu optimista.
Entretantu Diretor Nasional Apoiu Administrasaun Sukus, (DNAAS), Horacio Marques rekonese katak, feto Timor barak mak iha konesementu ne’ebe sufsiente atu halo dezenvolvimentu ba nasaun ida ne’e e merese atu kompete ho mane sira iha prosesu eleisaun hotu inklui mos eleisaun munisipiu.
“Ita hare partisipasaun feto iha vida politika en jeral hanesan iha Parlamentu Nasional iha feto barak, Membru Governu sira mos feto barak tanba sira iha kapasidade duni, iha konesementu atu tur iha pozisaun ne’ebe iha, nune’e mos iha area rurais lideransa komunitaria sira povu hili bazeia ba kapasidade no konesementu,” Diretor Marques hateten.
Ne’e realidade ne’ebe iha no hatudu katak la’os mane deit mak fo kontribuisaun ba prosesu dezenvolvimentu, maibe partisipasaun feto mos maka’as iha prosesu dezenvolvimentu tanba feto sira komesa hatudu ona ba publiku katak feto mos matenek no bele duni.
