Estrada lampu merah area Colmera nian ne’ebe uluk rehabilita ona husi Kompania Estrada Bo’ot maibe Sekretariu Estadu Obras Publiku (SEOP) liu husi Diresaun Estrada haruka tenke sobu fali tanba la tuir tekniku sira iha baze e to’o agora kontinua paradu.
“Agora dadaun kompania kontinua rehabilita maibe hare liu parte ne’ebe pior liu iha Dili laran, ezemplu hanesan iha parte Embaixada Indonezia nian ne’ebe kuak barak liu sira taka tiha, no balun iha Lapangan Pramuka nian,” hateten Engineering Estrada SEOP, Jose Agusto, fulan kotuk iha Mandarin, Dili.
Engineer ne’e dehan, depois de ida ne’e hotu mak sira sei hare fali estrada parte Colmera nian ne’ebe agora paradu.
Enkuantu Deputadu Mateus de Jesus, konkorda ho planu SEOP nian taka hotu estrada ne’ebe maka kuak iha Dili laran, nune’e komunidade sira sente seguru wainhira uza transporte halai iha estrada.
“Maibe kompania tenke responsabilidade ba rehabilitasaun estrada iha parte Colmera ne’e, tanba uluk sira halo obra ona maibe tanba la tuir saida maka governu hakarak entaun sobu tiha, ne’e duni sira mos tenke halo fali to’o fin,” sujere Deputadu ne’e.
Deputadu ne’e dehan, kestaun estrada nudar problema ida mai Timor-Leste,e Governu tenke hatene lolos kona ba kualidade material ne’ebe maka kompania sira uza ba rehabilitasaun ne’e, atu nune’e ikus mai iha rezultadu ne’ebe mak diak no kualidade.
