Xefe Governu Xanana Gusmao promete, sei halo revizaun ba Lei Antigu Kombatentes Luta ba Libertasaun Nasional e alende ne’e governu mos sei hari Konselhu Kombatentes (KK) iha Distritu 13, nune’e bele identifika lolos ema sira ne’ebe uluk fo nia kontribuisaun ba independensia Timor-Leste.
“Nune’e bele hafasil veterannus balun ne’ebe durante ne’e seidauk simu subsidiu nudar veteran, sira bele hetan hotu hanesan mos sira seluk,” hateten Primeiru Ministru, Xanana Gusmao, fulan kotuk iha Parlamentu Nasional.
Tuir PM Gusmao, Governu kontinua fo apoiu orsamentu ba sira no sei fo bolsu estudus ba sira nia oan,liu-liu sira ne’ebe desfavorisiadu liu.
Entretantu Deputadu Manuel da Costa Pereira, apoiu planu ida ne’e atu nune’e veteranus sira hotu bele hetan sira nia direitu tanba veteranus balun to’o agora seidauk hetan sira nia direitu.
“Ne’e para labele halo diskriminasaun bo’ot ba iha veteranus sira, liu-liu maluk sira iha CPD-RDTL ne’ebe dehan sira veteranus maibe seidauk eskreve sira nia naran,” dehan Deputadu Pereira.
Entretantu Veteranus Paulo Lopes husi Distritu Same ne’ebe uluk luta iha ai laran durante tinan barak nia laran, maibe ikus mai nia naran la sai iha lista ne’ebe Komisaun Verifikasaun sira fo sai.
“Hau iha ai laran durante tinan hitu hamutuk ho hau nia kolega sira seluk, maibe hau mesak nia naran laiha lista, e kolega sira naran iha, entaun ne’e la justu,” Veteranu Lopes lamenta.
Tanba ne’e nia parte konkorda bainhira governu hari KK iha distritu hotu, nune’e Veteranus sira ne’ebe durante ne’e seidauk hetan sira nia direitu bele hetan hotu.
