Estrada diresaun Sub-distritu Gleno ho Suku Raiheu , Distritu Ermera at totalmente, no Komunidade sira iha Suku ne’e lamenta no halo sira desaraska bainhira atu ba iha Ermera vila.
“Estrada ne’e at los no halo ami sempre infrenta problema, no ema sira ne’ebe maka atu ba Ermera mos sente ladun kontente tanba kuaze dalan sira ne’e at hotu,” preokupa Komunidade Suku Raiheu,Agusto Amaral, foin lalais iha Ermera.
Tanba ne’e nia husu ba Governu tenke iha planu ne’ebe mak diak hodi hadia estrada ne’ebe mak at, nune’e labele impede komunidade sira atu lori sira nia produtu lokal ba merkadu.u
Iha lidun seluk Deputadu Arao Noe hateten, governu halo planu bazea ba Orsamentu Jeral du Estadu nian ne’ebe iha.
“Hanesan estrada ne’ebe iha Raiheu, se laiha planu 2012 halo konstrusaun ba estrada ne’e maka governu mos labele halo buat ida,” dehan Deputadu Noe.
Deputadu ne’e sujere ba governu, atu halo monitorizasaun ba estrada ne’ebe at iha teritoriu tomak, nune’e bele tau iha planu orsamentu estadu nian, hanesan estrada iha Suku Raiheu ne’e.
Entretantu Engineer Estrada, Jose Agusto hateten, iha tinan ida ne’e sira laiha planu atu hadia estrada ne’e maibe “ami so hare deit estrada parte Poetete nian,” tenik Engineerin ne’e.
Engineering Estrada ne’e dehan, prosesu rekolha dadus hodi halo konstrusaun tenke mai husi Xefe Suku hato’o ba Administrador, depois hato’o ba Xefe Regional Sekretariu Estadu Obras Publiku (SEOP) nian hafoin mai iha nasional hodi foti medidas.
“Durante ne’e ami la hare relatoriu hosi Raiheu karik sira nia Xefe Suku maka seidauk halo proposal ruma, kuandu ami simu ona relatoriu ruma antaun ami bele foti medidas,” dehan Engineering Agusto.
