Ho susesu ne’ebe Fundasaun Dezenvolve Futuru (FUNDEF) hetan durante ne’e hodi fo kapasitasaun ba foinsa ‘e no komunidade sira kona ba violasaun seksual, Caritas Australia pronto fo apoiu finanseiru ba sira, tanba kapasitasaun importante hodi garante estabilidade iha rai laran.
“Sira nia performes ne’ebe diak no grupu foinsa’e ne’ebe hahu ho fondasaun ne’ebe diak mos, hanesan sira rejistu ona iha NGO Forum sira agora halo lei inan no planu estrategiku sira sempre prontu atu simu sujestaun husi Caritas Australia, ne’e duni ami sente katak parseiru ho valor bo’ot ba Caritas tanba sira mak hanesan ami nia liman ain e ami iha esperansa bo’ot atu fo apoiu nafatin atu sira bele sai forte liu tan ba oin,” dehan Koordenador Programa Harii Dame Caritas Australia Timor-Leste, Fernando Pires, (27/08), iha Sede Suku Bairo-Pite, Dili.
Tuir nia, programa kapasitasaun importante hodi garante estabilidade iha rai laran, tanba ne’e kada tinan Caritas fo $8.000 atu hala’o programa liu-liu promove igualidade jeneru, halo prevensaun ba violasaun seksual inklui programa alfabetizasaun ba grupu feto iha Suku Bairo-Pite.
Iha parte seluk Fundador FUNDEF, Feliciano de Jesus Goncalves hateten hafoin hari durante tinan rua nia laran, FUNDEF konsege fo ona kapasitasaun ba joventude hamutuk 500 e tal pesoas, hanesan kursu lian Inglesh no komputador baziku.
“Ami kontente tebes tanba husi partisipantes ne’ebe iha, nain 130 resin mak hetan ona servisu iha instituisaun governu hanesan Ministerio Solidaridade Sosial, Sekretariu Estadu Formasaun Profesional, PNTL, F-FDTL e balun iha NGO no hetan bolsu estudu ba estudu iha rai liur,” dehan Fundador Goncalves.
FUNDEF harii husi joventude nain hat, iha tinan 2010 ho objetivu atu bele influensia ba joventude sira seluk, liu-liu iha Bairo-Pite katak ‘ho voilensia la rezolve problema tanba ne’e hapara violensia no hametin estabilidade iha sukus laran’.
FUNDEF oras ne’e halo daudauk revizaun ba sira nia lei inan ne’ebe durante ne’e vigor iha sira nia organizasaun laran hodi regula membrus sira inklui planu estratejiku ne’ebe durante tinan tolu implementa, nune’e iha future bele fo atendimentu ne’ebe diak ba joventude sira iha formasaun.
“Hau hanoin lei inan mak sai hanesan sasukat ida atu organizasaun ida bele susesu liu husi programa ne’ebe organizasaun atinji iha future,e ida ne’e importante tebes ba FUNDEF,” dehan Board FUNDEF, Ryou Nagai.
Wokshop durante loron tolu halo revizaun ba lei inan no planu estratejiku FUNDEF realiza ho suporta finanseira husi Caritas Australia ho montante $1.500.
