Hafoin simu pose no asumi hikas nia kargu nudar Sekretaria Estadu Promosaun Igualidade (SEPI), Idelta Maria Rodrigues hala’o enkontru ho Movimentu Feto, ho objetivu atu hadia sistema no dezafiu ne’ebe iha, hodi hametin liu tan relasaun servisu entre governu no sosiedade sivil, hodi luta ba igualidade jeneru.
“Hau hanoin ida ne’e vizita primeiru iha mandatu V governu, hau mai halo vizita kortezia ida ho Membrus Rede Feto hotu, hau atu rona sira nia difikuldades, problema ne’ebe sira hasoru iha IV governu, nune’e hau mos bele halo politika ruma atu reforsa tan papel feto iha sosiedade,” dehan SE Rodrigues, foin lalais hafoin halo enkontru ho Rede Feto, iha Fundasaun Alola,Mascarenhas, Dili.
Tuir nia, atu hadia situasaun feto Timor ho diak liu iha mandatu V Governu, importante tebes atu halo kolaborasaun diak ho Membru Parlamentu Nasional, liu-liu Grupu Feto Parlamentar (GMPTL) sira, nune’e ema bele rona feto nia lian no hetan rekonesementu husi sosiedade tomak.
“Iha buat barak mak SEPI hala’o ona iha tinan lima kotuk, maibe sei iha dezafiu barak tanba ne’e importante tebes grupu feto sira tenke solidu, unidu, hamutuk nune’e ema hotu bele rona feto sira nia lian no hetan rekonesementu husi sosiedade, se la’o ket-keta lian ne’ebe feto sira iha namlele,” SE.Rodrigues katak.
Sekretaria Estadu mos husu ba Membru Rede Feto sira atu husik hela dezafius no problemas sira ne’ebe iha tempu pasadu, hateke hodi lao ba oin hamutuk ho SEPI no parseirus hotu atu reforsa servisu Grupu Trabalhu Jeneru iha Nasional no Distrital, e ida ne’e mak xave atu halo mudansa.
Entretantu Diretora Rede Feto, Yasinta Luzina katak diskusaun ida ne’e importante tebes ba Movimentu Feto sira, liu-liu ba Rede Feto ho nia membrus tomak atu hadia situasaun feto iha Timor-Leste tantu nasional no distrital, ne’ebe kontinua sai vitima ba violensia.
“Atu hare hamutuk kona ba kolaborasaun servisu iha tinan lima liu-liu meus komunikasaun buat ne’ebe durante tinan hat kotuk lao la diak, ita bele hadia intermus suporta ba malu no kolaborasaun diak liu tan hodi promove igualidade jeneru to’o iha area rurais,” Diretora Luzina tenik.
