Sentru Ospitalidade Ajensia Dezenvolvementu Timor-Leste (ETDA) ne’ebe oras ne’e iha prosesu konstrusaun nia laran, ho total orsamentu hamutuk $250.000 sei remata no funsiona iha tinan 2013.
“Bainhira ami nia konstrusaun remata iha 2013, ami sei fo formasaun tuir kurikulum ne’ebe kompleta ho sertifikadu akreditadu numeru um to’o kuatru iha area ospitalidade nian, ezemplu ami sei iha treinu dapur nian, barrista (aprende halo kafe), house keeping no restorante nian,” hateten Diretora ETDA, Palmira Pires, foin lalais iha Fatuhada, Dili.
Kona ba Treinador, oras ne’e dadaun ETDA prepara hela ema nain neen (6) iha area ospitalidade nian, kopera ho peritus husi Australia Don Hancey no Justin Strange, e sira promete sei fo formasaun ne’ebe ho kualidade ba formador sira.
ETDA loke Sentru Ospitalidade ba joventude sira, hanesan parte ida kria kampu servisu ba sira ne’ebe sei dezempregu hela.
“Maibe sira presiza tulun husi governu tanba atu halo kursu ne’ebe Hostender ne’e presiza kustu ne’ebe bo’ot,” Diretora ne’e tenik.
Formasaun ne’e fo mos oportunidade ba joventude sira husi distritus ne’ebe iha interese ba area ospitalidade nian e durante formasaun sira bele hela iha dormitoriu ne’ebe ETDA prepara ona.
Iha dormitoriu ne’e sei akumula joventude feto mane hamutuk nain 40 maibe seidauk determina kustu ba formasaun ne’e.
Entretantu tuir Peritu tein (Ahli masak) nian husi Australia, Don Hancey katak nudar amigus nia prontu fo apoiu no kopera ho ETDA hodi jere sentru ospitalidade ne’e ho diak, nune’e bele fo benefisiu ba joventude dezempregado sira iha rai laran iha futuru.
Iha parte seluk, Joventude Francisca Gaspar sente kontente ho program ne’ebe ETDA iha alende iha area ospitalidade sira mos iha programa barak hodi dezenvolve kapasidade joventude sira nian hanesan kursu lingua Ingles,komputador baziku, manajementu no seluk tan.
“Hau sente kontente bainhira governu fo apoiu atu dezenvolve area ospitalidade hanesan harii sentru ospitalidade iha Timor, tanba ho ospitalidade bele fo kampu servisu ne’ebe diak ba joven sira no bele rezolve joven sira nia ezijensia iha future,” nia tenik.
