SE Clinton hasoru ho Primeiru Ministro Xanana Gusmão no mos ho Presidente da Republica Taur Matan Ruak.
Hafoin reuniao ho SE Clinton, PM Gusmao iha oportunidade atu hato’o apresiasaun nasional ba vizita SE Clinton ba Timor-Leste.
“Senhora, ita nudar inspirasaun ba ami iha Timor-Leste. Ita nia vizita sei rai iha memoria ita nia ema ba tinan barak atu mai. Ita nia vizita simboliza ita nia kontribuisaun ba rejiao ne’e no mos ba mundo,” hateten PM Gusmao.
Durante diskusoens mos planus rejional no global no relasoens internasionais mos koalia; no lideres rua ne’e refleta mos kona ba kontribuisaun USA ba Timor-Leste nia dezenvolvimento.
“Estadus Unidos suporta hametin ami nia estrutura boa governasaun, no mos suporta mos ami nia Komisaun Anti Korrupsaun ne’ebe nudar faktor reforma importante ba ita nia nasaun. Suporta mos dezenvolve ami nia sektor privado, sektor agrikultura no dezenvolve ami nia industria kafe,” haktuir tan PM.
Vizita ne’e vizita ba dahukuk hosi USA nia Sekretario Estadu ida ba Timor-Leste desde independensia iha 2002.
“Honra bo’ot ba hau sai nudar Sekretario Estadu USA nian dahuluk mai vizita Timor-Leste,” hateten SE Clinton.
Nia mos valoriza Timor-Leste nudar nasaun primeiru iha Asia, no terseiru iha mundu atu halo tuir Inisiativa Transparensia ba Industrias Estrativas.
“Hanesan ita bo’ot sira bele nota liu hosi faktu ida katak la iha nasaun barak iha mundo tomak mak konsegue halo buat ne’ebe Timor-Leste halo no ida ne’e nudar realizasaun bo’ot ida.”
Durante konferensia imprensa tuir diskusoens ho PM Gusmao, SE Clinton anunsia programa bolsas de estudu ho valor $6.5M (milhao) atu fo oportunidade ba juventude Timoroan atu tuir kursus akademiku iha EUA.
“Ami nia prioridade hamutuk ida mak atu garante katak juventude Timor-Leste iha oportunidade atu realiza potensial ne’ebe Maromak fo. Hau haree labarik-eskola furak barak los iha dalan hosi aeroporto mai iha reuniao ne’e ohin – ami hakarak atu suporta sira nia futuro.”
SE Clinton visita mos Kooperative Kafe Timor, projektu ho fundus hosi EUA, no bele koko hemu no gosta kafe Timor.
“Hau rasik bele dehan kafe ne’e kapas los no hau sei lori mos fila fali ba uma atu hemu hamutuk ho hau nia familia.”
