“Ro ne’e mai husi Jakarta, liu laloran bo’ot liu iha ita nia Kosta Sul, ne’e duni nia bele halo operasaun iha Kosta Sul,” dehan Komandante Polisia Maritima, Superintendente Lino Saldanha, (25/08), iha serimonia lansamentu ro ne’e, iha Portu Dili.
Tanba ne’e, Komandante ne’e husu ba Governu kria kondisoens ne’ebe diak ba ema sira ne’ebe servisu iha area maritime.
“Ita hakarak ema servisu badinas, presiza atensaun ba ema ne’ebe maka kaer ro ne’e, tenke han bosu, no nia fen ho nia oan moris hakmatek, salariu nato’on no hahan naton,kuandu nia ba servisu iha tasi laran mais iha uma hahan laiha, klaru ke nia servisu la ho laran,” Komandante Saldanha fo hanoin.
Entretantu Sekretariu Estadu Seguransa (SES), Francisco Guterres garante katak ro Lusitania ne’e iha forsa atu halo operasaun iha tasi mane ne’eba.
“Ro ne’e forsa duni no diak tebes atu halo operasaun ne’ebe maka masimu ba ita nia tasi,” dehan SE Guterres.
Tuir nia, agora hare oinsa mak bele aumenta tan ekipamentus ne’ebe maka presiza inklui kombustivel no hadia kondisaun ba ema sira ne’ebe servisu iha ro ne’e.
“Dala barak ita haruka sira ba semana ida iha tasi laran, mai fali ita mos tenke prepara kondisaun ba sira, ida ne’e maka hau hanoin tenke prepara planu no iha 2013 ita bele responde ho diak,” dehan Sekretariu Estadu ne’e.
