Governu liu husi Sekretariu Estadu Seguransa (SES) tenke aloka orsamentu ba manuntensaun ro nian, nune’e bainhira ro aat bele halo manutensaun.
“Simu ro foun ne’e mehi ida, maibe atu garante nia manutensaun ne’e presiza komitmentu bo’ot, dala barak ami eziji orsamentu ba manutensaun laiha,” dehan Komandante Jeral Polisia Nasional Timor-Leste (PNTL), Komisariu Longuinhos Monteiro, (25/08), iha serimonia inagurasaun Ro Lusitania, iha Portu Dili.
Komisariu Monteiro kestiona asuntu ne’e tanba durante ne’e ro hirak ne’ebe iha at la halo manutensaun tanba falta de orsamentu.
“Kuandu laiha orsamentu ba manutensaun hau fiar katak ro ne’e nia durasaun la to’o tan tinan ida at fali ona,” Komisariu ne’e duvida.
Entretantu Primeiru Ministru (PM), Kay Rala Xanana Gusmao,dehan manutensaun ba ro ne’e importante no tenke halo manutensaun masimu bar o hirak ne’ebe at.
“Problema manutensaun ne’e eziji be-beik katak kada institusaun estadu nian halo nian programa ho diak, la’e ita sosa deit, sosa deit,” dehan PM Gusmao.
Tuir nia, wainhira kuandu iha programa ne’ebe maka diak, konserteza Governu tenke tau orsamentu ba buat ne’ebe maka importante. “karik bele halo planu annual di-diak, entaun ita bele responde ba buat sira ne’e hotu,” dehan PM Gusmao.
