Membru Parlamentu Nasional liu husi Bankada Opozisaun Fretilin lamenta tanba Komunidade Suku Fatu-Haku no Uai-Oli to’o agora seidauk hetan asesu ba eletrisidade maske lina enerjia eletrika instala tiha ona.
“Iha Venilale aldeia ida ne’ebe iha liu klaran husi lina jeral ne’e seidauk tama, hahu husi eskola ida ba to’o iha fatin ida naran iha Mota atu ba Uai-Oli dada uluk iha ne’eba, instalasaun tama iha uma laran hotu ona maibe ahi la lakan,” lamenta Deputadu Manuel Castro, (27/08), iha PN.
Alende ne’e tuir Deputadu husi Bankada Partidu Demokratiku (PD), Adriano Joao promote sei hato’o kestaun ne’e ba iha Komisaun E ne’ebe trata asuntu eletrisidade nian.
“Ami sei hato’o mos ba komisaun kompetente nebe mak kaer Infrastrutura atu bele koalia ho Ministeriu kompetente, nune’e komunidade sira iha fatinnne’eba bele asesu baa ahi,” Deputadu ne’e tenik.
Iha fatin hanesan Prezidenti Komisaun E Parlamentar, Deputadu Pedro da Costa hateten,eletrisidade la lakan iha Fatu-Haku tanba komunidade sira iha fatin ne’eba la kuidadu sasan ne’ebe governu tau iha ne’eba.
“Populasaun sira baku at tiha trafu sira ne’ebe mak monta iha ne’eba, entaun eletrisidade la to’o duni tanba ita la kopera,” dehan Deputadu da Costa.
Maibe tuir nia, Governu sei fo eletrisidade ba ema tomak, “Se suku balun mak seidauk to’o neneik sei to’o iha ne’eba, ami hanesan reprezentante povu ami eziji dada lalais ahi to’o iha ne’eba maibe koperasaun ema hotu-hotu nian,” Deputadu ne’e garante.
