Desde tinan 2000 to’o agora Komunidade Sub-distritu Venilale, Distritu Baucau infrenta problema bee moos, maibe Governu nunka tau matan e situasaun ida ne’e obriga komunidade konsumu bee posu ba nesesidade lor-loron nian.
“Governu bele halo nia programa husi PDD 1 no PDD 2 dada iha Bahamori, iha Berecoli maibe sentru ne’e rasik Governu la tau matan,” levanta Deputadu Manuel Castro, iha plenaria Parlamentu, (27/08), iha PN.
Nia haktuir, iha kanalizasaun ne’ebe uluk halo iha tinan 1987,(Padre Lokateli mak halo) maibe to’o agora estadu nunka tau matan.
Entretantu Deputadu Adriano Joao katak, problema falta bee moos la’os deit komunidade Venilale, maibe kuaze distritu hotu iha teritoriu tomak to’o agora la asesu bee moos.
“Tanba ne’e husu ba Kintu Governu Konstitusional ne’ebe iha ona Sekretariu Estadu propriu atu rezolve problema bee moos,” Deputadu ne’e sujere.
Tanba ne’e tuir Deputadu Joao, iha orsamentu rektifikativu ne’ebe mak Governu sei aprezenta ba Parlamentu, sira sei haka’as aan ministeriu kompetente hodi tau matan ba asuntu ne’e.
Hatan ba kestaun ne’e Sekretariu Estadu Agua Saneamentu e Urbanizasaun (SEASU), Elias Pereira Moniz katak,Governu sei servisu hamutuk ho NGO sira oinsa mak bele kanaliza bee moos ba komunidade sira.
“Tan ida ne’e mak antes atu implementa konstrusaun fiziku ba agua rural ne’e iha sistema ida-idak tenke ser iha grupu, jestaun no fasilidades ninian ,” dehan SE Moniz.
Tuir nia, konstrusaun fiziku ba agura rural agora la’o hela maibe planu ne’e liu husi programa distrital ninian.
