“Tasi Timor-Leste iha riku soin barak, no mesak kapas-kapas deit, ne’e duni presiza kontrolasaun ne’ebe maka masimu husi Polisia Maritima,tanba ne’e ami oferese Ro Lusitania ne’e hodi ajuda netik Polisia Maritima atu halo operasaun,” dehan Diretor PT. Permai Multi Guna, Arnold Chay Muliono, (25/08), iha serimonia inagura Ro ne’e, iha Portu Dili.
Tuir nia, iha Indonezia, Kompania PT.Permai Multi Guna sempre hetan konfiansa, liu-liu ro ba Polisia Maritima nian.
Tanba ne’e Kompania kontinua akompanha hodi kontrola ro ne’e inklui servisu PM nian, oinsa mak sira bele uza ro ne’e.
“Ami nia kompania iha esperiensia barak no iha Indonesia hetan konfiansa be-beik ona, liu-liu halo ro ba Polisia Maritime sira,” Diretor Muliono afirma.
Iha okaziaun hanesan Komandante Jeral Polisia Nasional Timor-Leste (PNTL), Komisariu Longuinhos Monteiro, agradese ba koperasaun servisu diak entre Kompania PT. Permai Multi Guna husi Indonesia ho PNTL, liu-liu ba Polisia Maritima.
“Ho Ro Lusitania ida ne’e espera katak Polisia Maritima bele kompriende liu tan, no bele asumi liu tan imi responsabilidade, imi nia disiplina atu tau matan ba Lusitania no ba ita nia riku soin tasi Timor nian,” Komisariu Monteiro esperansa.
Komisariu ne’e dehan, Ro ne’e iha duni kualidade tanba ho volume masimu 20 Nott bele atinji velosidade 37 kilo metru pur oras, no kuandu ho volume minimu 15.18 Nott, bele atinji deit velosidade 27 kilo metru pur oras.
Tanba ne’e husu ba PM sira bele atu uza fasilidade ne’e ho diak, hodi bele servi no proteze saida maka nudar Timor oan nia riku soin.
Marka prezensa iha serimonia inagura Ro Lusitania ne’e mak Prezident Parlamentu Nasional, Vicente Guterres no Primeiru Ministru, Kay Rala Xanana Gusmao, Primeira Dama Isabel Ferreira no Secretariu Estadu Seguransa, Francisco Guterres no Komandante Jeral PNTL, Komisariu Longuinhos Monteiro, inklui Diretor PT. Permai Multi Guna Indonesia, Arnold Chay Muliono.
