Vitima AG no AP ne’ebe sira nia uma inklui sasan uma laran hetan sunu no lakon hotu iha krizi military 2006, Vitima lori Arguidu MC, RC no FR ba tribunal hodi prosesa tuir lei ne’ebe iha, tanba diskunfia sira mak na’ok.
“Sira bolu ami dehan firaku, e iha momentu ne’eba ami halai tiha ba seminariu, tanba ami tauk ho sira bo iha tempu ne’eba, hau nia uma sunu hotu no hau nia sasan lakon hotu,” deklara Vitima AG, (24/08), iha Tribunal Distrital Dili (TDD), Mandarin, Dili.
Akontesementu ne’e rasik akontese iha 26 Outubru 2006 iha area Fatumeta Aldeia 05 de Outubru.
Vitima AG deklara, iha tempu ne’eba Arguidu nain tolu ne’e sempre la’o ho grupu no lori ho sasan kroat inklui hasai liafuan aat ba vitima.
“Sira duni ami husi bairo ne’e mesmu ami fila mai ona no ami nia sasan laiha ona no ami triste,” dehan Vitima ne’e.
Vitima dehan, sasan hirak ne’ebe lakon iha krizi ne’e sura ba osan ho montante 10 milioens.
Entretantu Arguidu FR iha nia deklarasaun iha Tribunal katak, iha momentu ne’eba nia la’o ho MC no RC tanba ajuda malu, maibe la’os atu na’ok sasan.
“Hau lori hau nia familia sira halai hodi salva ami nia vida, iha tempu ne’eba ami halai hotu, tanba ema sira ne’ebe maka mai ne’e mesak ho kroat deit ne’e, o atu ba na’ok fali sasan ga atu salva o nia vida, ne’e la logika tebes,” deklara Arguidu FR.
Tanba ne’e Arguidu rezeita no lalos kuandu Vitima dehan sira mak naok sasan vitima nian iha momentu ne’eba.
Enkuantu julgamentu ne’e diriji husi Juis kollectiva Antonio Gomes, Antoninho Gonsalves no Antonio do Carmo.
Hafoin rona tiha deklarasaun husi Vitima no Arguidu, Juis deside atu rona tan deklarasaun husi testamunha seluk hanesan Arguidu MC no RC ne’ebe la marka prezensa iha julgamentu ne’e.
