Jaimito Santiago Soares, Komunidade Bidau Santana dehan, vendedor sira buka fa’an deit sira nia ikan iha Estrada ibun, no hamamuk tiha mini merkadu ne’e.
“Hau hare tinan kotuk ne’e mak sira fa’an iha ne’eba maibe agora sira la fa’an iha ne’eba,” hateten Komunidade Soares, iha Bidau Santana, Dili.
Alende ne’e Paul Rodrigues Monis nebe halao nia knar iha sede suku Bidau Santana informa katak,Governu fakar osan deit ba Mini Merkadu ne’e maibe la utiliza no husik abandona deit.
“Agora Governu hari’I tiha Mini Merkadu hanesan ne’eba maibe la haruka Vendedores sira atu fa’an sira nia ikan ba fatin ne’eba,” Komundade Monis preokupa.
Tanba ne’e nia husu ba iha Governu atu haruka Vendedor sira fa’an ikan iha Mini Merkadu ne’e, nune;e labele husik abandona hanesan ne’e.
“Agora Kulkas mesak bo-bo’ot deit mak tau iha ne’eba maibe la uza to’o agora sai at tan deit tanba ne’e mak ami husu ba iha Governu at muda Vendedor sira ba iha fatin ne’eba,” komunidade ne’e sujere.
Iha sorin seluk Deputadu Virgilio Hornai hateten, ministeriu kompetente tenke responsabilliza, tanba ne’e halo ho osan povu nian.
“Fatin ne’e diak ita hotu hakarak maibe fila fali ba ita nia vendedor sira, e ministeriu relevante tenke responsabiliza,” Deputadu Hornai dehan.
