“Ministeriu ida-idak mak rekruta ema,e Komisaun Funsaun Publika hare deit rekrutamentu ne’e tuir prosedimentu legais ga lae,se buat ruma sala mak sira foin bele foti asaun,” kritika Deputadu Estanislao da Silva, iha PN.
La’os laiha razaun, Deputadu ne’e dehan, rekrutamentu ne’ebe KFP halo durante ne’e hodi nomeia ema balun ba kargu politika, la tuir nesesidade ministeriu ida-idak nian.
“Ita agora problema at liu tan tanba ita rekruta ema balun seidauk iha esperiensia so deit kursu mestradu sae fali Xefe, maibe ema ne’ebe servisu kleur ho esperiensia tinan 10 iha nivel tres ka kuatru nunka sae,” Deputadu ne’e kestiona.
Entretantu Vise Prezidenti Parlamentu Nasional (VPN), Deputadu Aderito Hugo dehan, kompetensia Komisaun Funsaun Publika halo rekrutamentu ba funsiunariu foun define husi lei.
“Agora kobertura Komisaun Funsaun Publika nian bazea ba lei, e lei mak fo kompetensia ba Komisaun Funsaun Publika oinsa mak halo rekrutamentu ba kareira profesionais sira,” Vise PN ne’e esplika.
Tuir nia, antes ne’e ministeriu ida-idak mak halo planu hodi rekruta sira nia funsiunariu, maibe deskontroladu.
“Entaun tan ne’e mak ita iha Komisaun Funsaun Publika fo kompetensia ba nia atu halo rekrutamentu para ita organiza didiak, orientadu tuir ministeriu ida-idak ninian, kompetensia ida ne’e diak tanba bele evita favoritismu iha prosesu rekrutamentu ninian,” dehan Vise PN ne’e.
Enkuantu bainhira TDW koko konfirma asuntu ne’e ba iha Prezidenti KFP, Liborio Pereira maibe lakonsege tanba iha fatin.
