Tuir Reprezentante Organizasaun Grupu Feto Liquisa, Maria Fernandes Mendes, katak antes implementa Lei VD numeru kazu ladun barak kompara ho depois de implementa.
“Iha tinan 2008 Violensia Domestika iha Distritu Liquisa hamutuk 315 kazus, enkuantu iha tinan 2010 depois de aplika lei VD husi 315 sa’e to’o 351 kazus, ne’e duni hau hanoin lei ne’ebe maka iha seidauk iha influensia,” tenik Reprezentante Grupu Feto Distritu Liquisa ne’e, (17/08),iha Distritu Liquisa.
Tanba ne’e nia husu ba Governu liu husi Sekretaria Estadu Promosaun Igualidade (SEPI), atu kontinua halo sosializasaun lei Vdba komunidade sira, liu-liu iha area rural, e mos tenke halo peskiza ba implementasaun lei ne’e.
Entretantu Xefe Suku Distirtu Liquisa, Agusto Vidigal hateten Violensia Domestika iha nanis desde tempu bei ala sira, tanba ne’e susar atu halakon.
“Ita atu muda ema nia mentalidade presiza tempu ne’ebe maka naruk, lei ne’e iha ona, maibe kuandu ema ne’e maka lakohi atu muda nia hahalok, ne’e kusta, tenke iha konsiensia husi ema ne’e rasik, no sempre iha formasaun kona ba ida ne’e,” dehan Xefe Suku ne’e.
