“Bainhira iha mane ida no feto ida ne’ebe maka alista sira nain rua nia naran atu ba kaben, iha tempu ne’eba husi parte igreja sei fo formasaun, hatete ba sira katak, wainhira hola malu labele baku malu, labele soe malu, no fo atensaun katak wainhira iha problema tenke koalia ho didiak,” dehan Reprezentante Igreja Maria Natalia da Costa, (17/08),ne’ebe partisipa iha sorumutu ‘Tinan rua implementa Lei Violensia Domestika’, iha Distritu Liquisa.
Alened ne’e Igreja liu husi Progarama Solidaridade, fo formasaun espesifikamente ba Kaben Nain (feto sira ne’ebe maka sai Vitima ba Violensia Domestika, no Joven feto no mane sira ) iha Distritu Liquisa kona ba Lei Violensia Domestika, no oinsa halo komonikasaun ne’ebe maka diak ho la’en sira.
Entretantu Administrador Distritu Liquisa, Domingos da C.dos Santos hateten, atu hamenus numeru kazu Violensia Domestika importente mak servisu hamutuk ho entidade hotu.
“Sosidade sivil, igreja, no governu iha papel importante atu bele hamenus VD ne’e, tanba igreja ukun povu hanesan sarani, estadu ukun povu hanesan povu, sosidade mos moris iha sosidade nia le’et, antaun ita hotu-hotu iha papel importante atu haklaken ba ita nia komunidade,” dehan Administrador Santos.
Iha mos atividade seluk ne’ebe parte Igreja halo mak enkoraja komunidade sira atu labele halo asaun krimé, no igreja mos iha papel oinsa mak enkoraja kaben nain sira kria dame no pas iha sira nia uma kain laran.
