“Bazea ba difikuldade no esperiensia ne’ebe ami hasoru durante ne’e, ami hakarak rekomenda ba governu atu haforsa sistema referral iha rai laran, liu-liu iha baze hanesan Servisu Integrado Saúde Komunitaria (SISKA), Sentru Saúde, Ospital Referral to’o Nasional kompleta ekipamentus, nune’e pasiente ne’ebe halo rujukan mai nasional ne’e bele salva, e mos bele minimize gastus orsamentu ba halo tratamentu iha rai liur,” rekomenda Prezidente AMTL, Doutora Virna Maria Gusmão dos Reis Martins Sam, (17/08), iha Kongresu Nasional AMTL, iha Bidau Toko Baru, Dili.
Alende ne’e AMTL mos rekomenda mos ba MS atu hadia no aprova official kriteriu ba pasiente komun, VIP ne’ebe presiza halo tratamentu iha rai liur,no tenke estabelese sekretariadu ida hodi halo tratamentu ba dokumentus pasiente ne’ebe ba rai liur.
Iha Kongresu Nasional durante loron tolu ne’e (17-19 Agustu) AMTL sei hato’o proposta ida ba MS hodi reforsa kontribuisaun AMTL ba dezenvolvimentus Nasional liu-liu iha seitor saúde nian tanba Timor –Leste iha ona medikus geral, espesialista hamutuk 180 ne’ebe agora kobre ona teritorio tomak.
Iha parte seluk Diretora Nasional Hospitalaria, Ana Maria Pereira Magno hateten administrasaun ba sistema referral ne’ebe durante ne’e tarde hodi fo atendementu ba pasiente emerjensia, tanba orsamentu hotu sei jere husi Ministeriu Finansas no sai tarde.
“Ami mos konkorda presiza duni iha peti cash ruma husi budget ne’ebe iha atu tau iha brankas Ministeriu Saúde nian hodi bele atende pasiente sira ne’ebe presiza emerjensia halo tratamentu iha rai liur,” dehan Diretora Magno.
Nia promete sei lori rekomendasaun sira ne’ebe iha hodi hato’o ba Minsiterio Saúde atu tau konsiderasaun no sira mos sei esforsu atu kria jestaun ne’ebe diak hodi fasilita prosesu sira ne’e tanba ne’e relasiona ho ema nia vida.
