Komunidade Sub-disritu Nitibe sujere ba governu atu halo estudu ne’ebe klean antes implementa projeitu ruma, tanba dalabarak projeitu hirak ne’ebe iha la koresponde ho nesesidade komunidade nian.
“Tenke halo survey ne’ebe diak, atu nune’e bele responde populasaun sira nia nesesidade, ezemplu konstruksaun haris fatin iha eskola Pre Primaria Publiku Baok Nana ne’ebe fakar osan bo’ot maibe agora la funsiona ona,” preokupa Reprezentante Komunidade Nitibe, Arlindo Sico Elo, bainhira partisipa iha Forum Governu Demokratika ne’ebe realiza husi UNMIT, (14/08), iha Salaun Enkontru Igreja Baok Nana, iha Nitibe, Oe-Cusse.
Tuir Komunidade ne’e, kontrusaun haris fatin iha eskola Pre Primaria Baok Nana foin mak halo tinan ida aat tiha, ho gasta orsamentu ho montante besik miliaun ida.
Entretantu tuir Amu Paroku Parokia Baok Nana, João Tamonob, SVD katak dezenvolvementu balun ne’ebe agora iha Distritu Oe-Cusse iha hanesan pameran deit, maibe la hare ba nia sustentabilidade.
Iha fatin hanesan Administrador Sub-distritu Nitibe, Eurico Bobo rekonese katak, mosu duni failansu tanba projeitu balun indireita no direita husi nasional sein iha konesementu husi autoridade lokal.
“Obra balun mai husi PDD maibe balun mai husi nasional direitamente tau konstruksaun sein iha konesementu husi autoridade lokais,” Administrador Bobo rekonese.
Hatan ba kestaun ne’e Prezidente Komisaun Dezenvolvementu Distrital Distritu Oé-Cusse, Jose Anunu katak, sistema implementasaun projeitu PDD la’os CDD mesak maka foti desizaun maibe involve Xefe Sukus inklui ministerio relevantes.
“Ba projeitu PDD sira ne’e ita iha modelu ida ne’ebe maka mai husi suku sira, sira iha planu hakarak atu halo saida inklui PDL depois maka konfirma ho sectores maka halo estudu,” Prezidente CDD Anunu esplika.
