“Ita nia atividade identifikasaun moras HIV/SIDA iha Timor- Leste hahu kedas iha tinan 2003 to’o agora fin de Julhu tinan ida ne’e, total kazu ne’ebe ita akumula hamutuk 294, husi numeru ne’ebe iha entre fulan April to’o Junu ita aumenta tan kazu 21, total kazu identifika foun husi fulan Janeiru to’o Julhu tinan ida ne’e hamutuk 38, ne’e hatudu katak loron ba loron, fulan ba fulan kazu HIV/SIDA aumenta ba bei-beik liu-liu afeta ba grupu idade reproduktivu,” dehan Xefe Gabinete Sistema Informasaun Ministeriu Saude, João P. A. da Silva, (17/08), iha Salaun Vila Verde, Dili.
Husi numeru ne’e kompostu husi feto na’in 147, (na’in 9 mate ona), no mane na’in 147 (na’in 22 mak mate), enkuantu feto na’in 31 no mane na’in 73 mak hala’o hela tratamentu Anti Retroviral (ARV) iha Ospital Nasional Guido Valadares (HNGV) no Klinika Bairo-Pite (KBP), no seluk sei livre hela iha komunidade nia le’et.
Xefe Gabinete ne’e dehan, ho dadus ida ne’e bele sai hanesan baze ida ba Ministeriu Saude atu halo planu hanesan halo advokasia ba area preventiva.
Iha oportunidade hanesan, Sekretariu Jeral Komisaun Nasional Luta Hasoru HIV/SIDA (KNLHS), Rui de Carvalho hateten nudar parseiru governu prontu nafatin atu halo sosializasaun no halo kampanha ba HIV/SIDA iha distritus, liu-liu area rurais sira inklui mos sai tama eskola hotu iha teritoriu tomak.
“Hau hanoin ema barak mak hatene ona oinsa atu prevene an husi virus HIV/SIDA hanesan ABC katak Abstinent (jejun), Beautiful, Condom hanesan alternativu ikus ne’ebe sira uza atu labele hetan moras HIV/SIDA,” dehan SJ. Carvalho.
Enkuantu tuir dadus ne’ebe iha Distritu Dili sai maioria (242 Kazus), Bobonaro (21 Kazus ), Baucau (11 kazus) no distritu sira seluk maibe ho tasa ne’ebe ki’ik.
Relatorio Numeru Kazu HIV/SIDA, Mate Tuir Tinan Relatoriu, 2003-Junu 2012:
Tinan Kazu HIV Sei Moris Mate Total Kazu HIV
2003 1 0 1
2004 3 1 4
2005 7 5 12
2006 22 6 28
2007 22 3 25
2008 26 4 30
2009 50 1 51
2010 57 3 60
2011 47 4 51
2012–Q1 8 3 11
2012-Q2 20 1 21
Total 263 31 294
