Tanba tuir nia, servisu Pesoal Saude hanesan vokasaun ida, e tenke servi povu ho domin tuir espiritu misionariu sira nian.
“Hau iha esperiensia dalaruma hau iha tuku 11:00 hau ba Sentru Saúde Pesoal Saúde sira konta istoria deit, maibe pasiente sira sei tur hein hela iha loket hein atedementu husi pesoal saúde sira.
Iha momentu ne’eba pasiente sira la konhese hau, entau sira hatete ba hau: Hanesan ne’e ami ohin mai husi tuku 10:00 deit ema la fo atendimentu ona sa’ tan ita bo’ot mai tuku 11:00, diak liu fila deit ona, ida ne’e attitude ne’ebe la diak. Ita presiza hadia etika atendimentu ba povu,” hateten Vise Ministra, Natalia de Araujo, foin lalais iha Sentru Konvensaun, Dili.
Nia hato’o kestaun ne’e relasiona ho attitude pesoal saude balun ne’ebe durante ne’e ladun hatudu etika profesionalismu bainhira atende pasiente sira.
Vise MS ne’e mos fo agradese ba eis Ministru Saúde Doutor Nelson Martins ne’ebe estabelese ona Programa Servisu Integradu Saúde Komunitaria (SISKA) maibe presiza hadia, tanba programa ne’e rasik seidauk la’o ho efetivu durante ne’e.
“Iha ekipa balun hahu iha tuku 9:00 to’o tuku 11:00 sira fila ona, ne’e la los SISKA ne’e oras walu iha komunidade nia le’et,” kritika Vise Ministra Saude ne’e.
Nia hatutan, sira mos sei hadia sistema Instituisaun Nasional da Saúde (INS) no apoiu sistema akademiku Universidade Nasional Timor Lorosa’e (UNTL), nune’e bele garantia kualidade ba iha setor saúde.
Tuir nia, importante mak funsiunariu sira iha Ministerio Saúde no Pesoal Saúde sira tenke fo liman ba malu atu dezenvolve etika no prestasaun servisu iha setor saúde no pesoal saúde sira tenke hadomi sira nia knar.
Iha parte seluk Komunidade Comoro, Rosantina da Costa, espera katak promesas hirak ne’ebele realiza duni no implementa iha pratika, no bele atende pasiente liu-liu inan isin rua sira ho diak liu tan iha futuro.
“Hau hanoin atu hadia etika pelayanan kesehatan ba pesoal saúde sira ne’e importante tebes maibe presiza tempu tanba ne’e relasiona ho ema ida-idak nia attitude, importante mak sira ida-idak tenke hadomi sira nia profisaun,” Komunidade da Costa tenik.
