“Alkatraun ne’ebé kompania sira halo dadaun iha capital laran ne’e, hau hare ne’e la tuir regras kontratu nian. Sira fui deit kaber e la halo aas oituan, hotu, taka ho rai heneik deit, ne’e kuandu udan halo bee nalihun iha estrada laran, entaun alkatraun sei at lalais,” preokupa Komunidade Numbei, Agostinho Fernandes, foin lalais iha Oe-Cusse.
Tuir nia, gasta orsamentu bar-barak ba sustentabilidade dezenvolvementu la’os ba sustentabilidade projeitu hodi hariku ema ida ka grupu.
“Dala ida tan hau husu ba governo, liu-liu Obras Publiku, atu neon nain halo kontrolasaun labele hare finji la hare, entaun fo fatin ba ema grupu ki’ik ida aproveita hodi hariku an ho sustentabilidade projeitu duke sustentabilidade dezenvolvementu,” sujere Komunidade ne’e.
Hatan ba kestaun ne’e diretor Obras Publiko Distritu Oe-cusse, Candido dos Reis Amaral katak sira halo ona monitorizasaun ba fatin projeitu, maibe seidauk bele fo sai rezultadu tanba projeitu ne’e seidauk hotu.
“Hau rasik tun ona ba fatin projeitu halo observasaun direitamente, maibe kona ba kualidade ka la’e, ne’e kestaun tekniku ita ema ba-bain labele hare deit ho matan foti ona desizaun katak la iha kualidade, ita hotu hein rezultadu ikus,” dehan Diretor Amaral.
