Atu promove diak liu tan joventude iha setor hotu ho profesionalismu, Sekretariu Estadu Joventude no Desportu (SEJD) iha tinan primeiru iha V Governu Konstitusional sei fo prioridade ba kapasitasaun nia funsiunariu sira ho etika servisu.
“Hau hanoin laiha buat foun ne’ebe atu halo maibe importante funsiunariu sira tenke iha disiplina as, servisu ho profesionalismu hodi bele lori planu ne’ebe SEJD iha durante tinan lima liu ba seidauk konsege halo hotu, hau espera katak servisu sira ne’e sei la’o diak liu tan tinan lima mai liu husi ema hotu nia dedikasaun, ita sei la’o tuir planu estrategiku SEJD nian ne’ebe iha,” hateten Sekretariu Estadu Miguel Manetelo, foin lalais iha Dili.
SE Manetelo haktuir, durante iha mandatu IV Governu dezenvolvimentu balun la’o ona hanesan setor desportivu, e balun mos la la’o hanesan formasaun ba lideransa joven sira nian sai futuru ba nasaun tanba area servisu SEDJ bo’ot maibe kompetensia oituan deit.
Sekretariu Estadu rekonese katak durante tinan lima ba kotuk SEJD investe osan bo’ot liu iha setor desportu maibe nia rezultado minimu tebes tanba falta linha de kordenasaun ho parseirus hanesan Federasaun no Asosiasaun sira e ba futuru sei hadia.
“Ami la ulun moras atu hala’o programa ka planu foun tanba ami kontinua konfiansa ne’ebe hau hetan iha governasaun ida ne’e, atu bele kompleta buat ne’ebe ami seidauk halo iha tinan lima no sira ne’ebe seidauk halo ami sei halo durante tinan lima ida ne’e,” dehan SE Manetelo.
Iha parte seluk Deputada Josefa Alvares Soares hateten etika servisu ne’e importante tebes ba funsiunariu sira, tanba dalabarak funsiunariu sira la kompriende etika servisu.
“Importante tebes kada ministeriu ou instituisaun fo formasaun ba funsiunariu sira labele atu kapasita deit matenek iha sira nia servisu, maibe tenke iha mos etika, disiplina servisu iha servisu fatin, se laiha entaun susar,” apoia Deputada Soares.
Koalia kona ba profesionalismu servisu, Primeiru Ministru, Kay Rala Xanana Gusmão iha serimonia tomada de pose ba Membru V Governu Konstitusional ejiji profesionalismu ne’ebe aas ba funsiunariu no sei tau atensaun ba etika trabalhu iha servisu fatin.
