Iha enkontru ho topiku ‘Uma Nação Dezenvolvida Entrega Sussesso, Dezafius e Oportunidades Para o Futuro’ kada Ministeriu ida-idak aprezenta sira nia rezultadu servisu ne’ebe durante ne’e sira halo ona. No mos parseirus dezenvolvimentu entrega sira nia relatorio progressus to’o ohin loron.
Durante nia diskursu Primeiru Ministru (PM) Kay Rala Xanana Gusmao katak area Administrasaun no Finansas publikus mak dezenvolvidu liu kompara ho area sira seluk.
“Dezemvolvidu liu hau hanoin, hau bele hatete deit reformas nebe ita halo’o iha administrasaun publika e finansas publika ida ne’e maka ami dehan estruturante. Hau hanoin reformas nebe ami halo ona iha tinan hirak ne’e maka hau sente ida ne’e ami nia ativamente,” dehan PM Gusmao.
PM Gusmao haktuir tan katak tinan-tinan Timor-Leste sempre halo enkontru ho nasaun parseiru sira kona ba saida mak halo ona no seidauk halo, nune’e sira bele tau osan ba setor ne’ebe seidauk hetan dezenvolvementu adekuadu tuir prioridades ne’e identifika hosi governu rasik.
PM Gusmao hein katak ba oin relasaun entre governu ho nia parseirus nudar entidades igual ne’ebe servisu hamutuk ba dezenvolvimentu sustentavel.
Iha fatin hanesan Ministru Estranjeiru Zacarias Albano da Costa, dehan enkontru ida ne’e hanesan enkontru ikus nian ne’e duni ministeriu balun kolia konaba sira servisu durante ne’e.
“Iha oportunidade ne’e mos iha ministeriu balun au mesmu tempu integra mos hanesan pasagen de testamunha servisu ne’ebe maka sira halo durante tinan lima ne’e, para depois governu foun bele kontinua buat diak ne’ebe governu ida ne’e halo, nune’e mos hadia saida maka seidauk diak,” dehan Ministru da Costa.
Ministru rekonese katak, durante tinan hirak nia laran, Timor-Leste hatudu ona progresu diak iha parte barak.
“Iha buat barak mak la’o diak hanesan educasaun, saude, iha politika esterna, finansas, mesmu iha infraestutura ladun dezenvolvidu, mais ita tenki kompriende katak buat barak sei atraza mais importante katak governu ida ne’e kria kondisoens para dezenvolvementu bele hala’o diak liu tan,” Ministru da Costa esperansa.
Iha oportunidade hanesan Embaixador Australia Miles Armitage, nudar reprezentante Parseiru Dezenvolvementu Australia ne’ebe partisipa iha enkontru ne’e dehan TLPDM ne’e importente tanba ho nune’e nasaun parseiru sira hatene dezenvolvementu iha nasaun ne’e.
“Fo oportunidade ba Timor-Leste atu hare ba futuro kona ba maneira katak governu Timorense ho governu seluk, servisu hamutuk atu atinji objetivu ba dezemvolvimentu,” hateten Embaixador Armitage.
Marka prezensa iha enkontru hos parseirus ne’e governu kompleto no mos lideransa judisiariu no lejislativu no mos funsionarius governu, reprezentantes sektor privado no mos sosiedade sivil.
