Komunidade Suku Ponilala, Distritu Ermera sente diskriminadu tanba iha aldeia rua mak la asesu ba eletrisidade, enkuantu aldeia tolu seluk hetan ona ahi.
“Dala ruma ita la’o hanesan diskriminasaun, kompania Abelar Unipesoal ladun responsabiliza nia servisu tanba durante halo instalasaun ahi iha suku, husi aldeia rua totalmente husik hela deit,” hateten Komunidade Suku Ponilala, Jorge Madeira hafoin hasoru malu ho deputadu sira husi bankada opozisaun Fretilin, semana kotuk (30/04) iha Uma Fukun, Dili.
Tuir Komunidade Madeira, prosesu instalasaun eletrisidade iha suku ne’e halo iha 2011, no ahi lakan durante fulan lima ona iha aldeia tolu hanesan Kotaeu, Herao no aldeia Nunu, enkuantu aldeia Sakoko no Hatukesi ahi seidauk tama.
“Lamentasaun ne’ebe mak ohin ami mai aprezenta iha Parlamentu Nasional, tanba kompania Abelar Unipesoal tama iha Ponilala la hatudu nia programa BOQ ba ami,” Komunidade Madeira lamenta.
Entertantu Membru Komisaun G Parlamentar, Deputadu Inacio Moreira konsidera, katak ida ne’e governu halo diskriminasaun ba povu sira.
“Dezenvolvimentu ba ema balun deit ka?,” Deputadu Moreira preokupa.
Tanba ne’e mak nia sujere ba meja Parlamentu hodi rekomenda ba iha ministeriu kompetente atu tau atensaun ba problema ne’e tanba povu presiza dezenvolvimentu hanesan.
