Tuir CMG Pedro Klamar Fuik, Instituto Defeza Nasional (IDN) importante teb-tebes, atu bele hare oinsa dezenvolve pensamentu estratejiku ba kuadru militar sira, kuadru sivil sira ne’ebe mak responsabiliza seguransa.
“Hau hanoin katak ida ne’e kontentamentu ida ke la’os ba hau deit, maibe ekstende ba ita nia nasaun,” hateten Diretor Jeral, CMG Pedro Clamar Fuik, semana kotuk (03/05) iha edifisiu F-FDTL Fatuhada, Dili.
Nia dehan, nomeasaun ida ne’e hanesan politika ida husi Governu, nudar militar tenke prontu no bele lori objetivu iha instituisaun ida ne’e nia laran hodi kontribui ba dezenvolvimentu nasional.
“Hau hanesan militar hau nia kontentamentu ne’e ekstende, husi hau to’o ba iha familia bo’ot F-FDTL nian, to’o iha nasaun tomak tanba kontentamentu ne’e rezulta husi responsabilidade foun ne’ebe mak hau foin simu hanesan Diretor Instituto Defeza Nasional,” Diretor Jeral, CMG Clamar Fuik dehan.
Entertantu Komandante Jeral F-FDTL, Xefe Estadu Maior Jeneral Lere Anan Timor hateten, pozisaun ida ne’e importante, no tenke tau ema ne’ebe bele dezenvolve instituisaun ne’e ba oin.
“Nia priense kriteriu, nia sei hala’o nia knar professional ho kapasidade ne’ebe mak nia iha,” Maior jeneral Lere Anan Timor esperansa.
Enkuantu Tenente Koronel Eugnenio das Neves, ne’ebe oras ne’e sei estuda hela iha Australia bainhira fila mai, nia mak asumi fali kargu Koronel Komponente Naval nian.
