Trabalhadores Timor oan la’os deit ejiji sira nia direitu, maibe mos iha deveres ne’ebe sira tenke hala’o ho responsabilidade, no governu tenke tau atensaun ba etika trabalhador sira nian iha future.
“Hau husu lalika hare liu mak direitu, hare mos ba deveres, ita tenki iha edukasaun diak ida ba ita nia trabalhador sira,” hateten Primeiru Ministru (PM) Xanana Gusmao, semana kotuk (30/04), iha Palacio do Governu, Dili.
Tuir PM.Gusmao, goverrnu iha ona planu estratejiku ne’ebe sei mosu oportunidade oi-oin deit iha futuru, hodi fo formasaun ba trablhador sira iha ne’ebe deit.
“Tanba ne’e ita sei halo eskola teknika professional tolu iha ita nia rai, ida iha leste, ida iha sentru,no ida iha weste, atu nune’e labarik foinsae sira ne’ebe la kosege ba iha universidade karik, sira bele hetan oportunidade atu hadiak liu tan sira nia kbi’it professional tekniku ninian,” PM. Gumao dehan.
PM. Gusmao mos fo parabens ba trabalhadores sira, ne’ebe selebra loron trabalhador nian iha dia 01 Maiu, tanba loron ne’e importante tebes ba sira.
“Ita foin tinan 10 ne’ebe espetativa bo’ot, maibe ita hotu haka’as an e hau senti katak, iha tinan 5 ka 10 iha future, ita iha ona nia kbi’it atu fo empregu atu eduka liu tan trabalhador sira sai diak liutan,” PM. Gusmao esprensa.
Entertantu tuir Deputadu Manuel Tilman, maske tinan-tinan halo komemorasaun loron trablhador nian, maibe iha nasaun laiha empregu.
“Direitu trabalhu obrigasaun ida konstitusional, obrigasaun estadu tenki fasilita, kria kondisoens para povu bele hetan servisu, no tenke hetan salariu ne’ebe diak” Deputadu Timan sujere.
Tanba ne’e tuir Deputadu Tilman, komemorasaun loron mundial trabalhu iha Timor hanesan sandiwara, tanba joven barak mak sei dezempregu hela.
