Tuir Vise Prezidente Parlamentu Nasional (VPN) Deputada Maria Paixao, katak iha Partidus Politiku balun araska atu hetan feto sira hodi involve iha sira nia partidus.
“Iha partidus balun, hau labele mensiona, sira hateten mai hau, katak ami araska los atu hetan feto involve iha ami nia partidu,” hateten Vise Prezidente Parlamentu Nasional (VPN) Deputada Maria Paixao, foin lalais (19/04) iha nia Gabinete, iha PN, Dili.
Tuir Vise Paixao, atu feto bele involve barak, partidus politiku sira tenke buka hakbesik ba iha komunidade sira iha baze, tenke enkoraje feto sira, atu sira bele tama iha partidus.
Entretantu Organizasaun Politika Caucus, ne’ebe durante ne’e fo formasaun ba iha feto potensial partidus politiku sira, rekonese katak iha partidus balun ladun iha feto.
Programa Manajer Caucus, Paula Corte Real Araujo, dehan ida ne’e akontese ba iha partidus politiku sira hanesan, Partidu Klibur Haburas Unidade Nasional Timor Oan (KHUNTO), no Partidu Liberta Povu Aileba (PLPA) no seluk tan.
“Karik tanba partidus sira ne’e sei foun, foin mosu mak hanesan ne’e,” hateten Manajer Araujo.
Maibe tuir nia, iha partidus bo’ot sira hanesan Fretilin, Congresu Nasional Rekonstrusaun Timor (CNRT), Partidu Sosial Demokrata (PSD) no Partidu Demokratika (PD) iha feto potensial barak teb-tebes.
“Sira iha mesak feto kapasitadu, feto potensial hotu ne’ebe pronto atu tur iha kualker pozisaun, tantu sai deputada, ministra no pozisaun seluk tan,” Manajer Araujo gava.
Iha parte seluk tuir Prezidente Partidu Liberta Povu Aileba, Francisco Gomes, nia parte rezeita informasaun ne’ebe dehan sira iha limitadu kona ba feto nian.
“Ne’e informasaun falsu, maske ami foun maibe ami agora iha feto hamutuk 30 kompara ho partidu sira seluk,” Prezidente Gomes rezeita.
Enkuantu iha partidu Asosiasaun Sosial Demokratika Timor (ASDT), oras ne’e dadaun feto ne’ebe ativu iha kuaze 25%.
“Ami iha feto hamutuk 150 e tal iha teritoriu tomak, ne’ebe tama iha estrutura partidu nian iha nivel distritu sira,” dehan Vise Prezidente ASDT, Francisco de Araujo.
