“Labele tama mai mak foin atu aprende, tenke fo konesementu ba sira oinsa mak tur iha komisaun, tur iha plenaria nian, no iha partidu rasik, e nia tenke lori aspirasaun partidu nian, nasaun nian, saida mak ita
define hanesan interese nasaun nian, saida mak ita define interese partidu nian, no mos saida mak ita define interese povu nian,” hateten Vise Prezidente Parlamentu Nasional (VPN) Deputada Maria Paixao, foin lalais (19/04) iha nia Gabinete, Parlamentu Nasional, Dili.
Tuir nia, iha sira nia partidu rasik fo ona formasaun ba sira nia membru feto sira, kona ba knar parlamentu nian, komisaun no plenariu nian.
Tanba ne’e VPN mos husu ba NGO sira ne’ebe durante ne’e fo kapasitasaun ba feto potensial sira, hanesan Rede Feto, UN Women no UNDP, atu fo formasaun ne’ebe klaru ba iha feto sira ne’e.
“E hau husu tiha ona sira, oinsa mak sir abele fo formasaun ne’ebe diak liu tan, liu-liu ba public speaking, leadership, oinsa mak halo kampanha no tenke focus ba feto potensial kapasitadus partidu nian, labele feto hotu-hotu,” Vise Paixao sujere.
“Ita tau tiha feto iha lista, tenke fo kedas treinamentu kona ba knar parlamentu nian, halo fiskalizasaun iha baze, la hanesan partidu balun haruka deputada-deputadu sira mai iha ne’e, foti asuntu ne’ebe ke nia simu husi telephone, depois levanta kedas iha plenaria, ne’e labele, ita tenke tun halo fiskalizasaun, verifikasaun, informasaun ne’e los ka la’e,” dehan Vise Paixao.
Entretantu Programa Manajer Caucus-Rede Feto, Paula Corte Real Araujo dehan, fo formasaun ba feto potensial Partidus Poitiku sira, la’os deit responsabilidade Caucus ka Rede Feto maibe Partidus Politiku sira hotu.
“Sira mos tenke fo kapasitasaun ba sira nia feto potensial sira, e treinamentu ne’ebe durante ne’e ami fo mak kona ba leadership, public speaking, making decision no seluk tan,” hateten Manajer Araujo.
