Atu feto potensial iha Partidus Politiku (Parpol) sira bele compete iha eleisaun lejislativu, Organizasaun politiku Caucus iha tempu badak sei fo formasaun ba sira.
Programa Manajer Caucus,Paula Corte Real Araujo dehan, treinamentu ne’e hanesan treinamentu kontinuasaun ne’ebe uluk halo tiha ona, kona ba lideransa transformativu ba iha feto potensial sira iha partidus politiku sira.
“Hahu iha dia 02 to’o dia 04 Maiu, ne’e ami halo TOT ka Training Of Trainer, ba feto potensial ne’ebe iha konesementu kona ba treinamentu ka sai treinador, kada partidu iha feto nain rua,” hateten Programa Manajer Araujo, semana kotuk (25/04) iha Mascarenhas, Dili.
Tuir nia, Caucus liu husi Fundasaun Alola hetan suporta fundus husi USAID no Kemitraan Indonezia ho total hamutuk US$ 15.615,00.
Entretantu tuir Sekretaris Komisaun Politika Nasional (CPN) iha Partidu Liberta Povu Aileba (PLPA), Augusta Quintao, katak sira pronto no preparadu atu tuir formasaun ne’e.
“Ami prepara, atu nain hira mos ami prepara, tanba ami iha feto hamutuk 30 resin,” hateten Sekretaris CPN. Quintao.
Tuir Sekretaris Quintao, formasaun ida ne’e importante, tanba aprende kona ba oinsa mak sai lideransa ne’ebe diak.
“Ne’e ba dala rua nian, ami husi PLPA tuir formasaun ne’ebe organiza husi Caucus, uluk ami tuir oona kona ba leadership nian e ami implementa ona ba iha ami nia membru sira iha atu sira mos bele hatene,” dehan tan Sekretaris Quintao.
Iha fatin hanesan Vise Prezidente Partidu Asosiasaun Sosial Demokratika Timor (ASDT), Deputadu Francisco de Araujo dehan, sira nia feto preparadu atu tuir formasaun ida ne’e.
“Ami nia maluk feto sira pronto iha kualker tempu atu tuir formasaun saida deit ne’ebe bele aumenta sira nia kapasidade,” hateten Vise Partidu ASDT de Araujo.
