Planu Ministeriu Saúde (MS) atu fo bolsu estudu ba Timor oan nain 80 atu ba hasai kursu iha area enfermajen no parteira nian iha Indonezia, oras ne’e dadaun MS analiza hela ba sistema akademika universidade sira iha Indonezia.
“Prosesu rekrutamentu seidauk la’o, tanba ami sei hare didiak fali hodi ba lobi universidade rua, ida iha Kupan no Jawa, atu ita bele hetan solusaun katak ida ne’ebe mak diak atu halo diskusaun hodi foti desizaun,” hateten Xefe de Araujo, semana kotuk (12/04) iha nia knar fatin Kaikoli, Dili.
Xefe de Araujo hatutan, prosesu rekrutamentu ne’ebe Universidade Nasional Timor Lorosa’e (UNTL) ho Ministerio halo lahanesan, tanba UNTL halo rekrutamentu ba estudantes tuir kriteria akademiku katak tenke valor ne’ebe diak , iha ona kuinesementu ba area saúde no latuir fatin ne’ebe presiza, nune’e mos ministerio saúde nia rekrutamentu bazeia ejijensia ne’ebe povu iha area rurais iha.
Nia dehan, prosesu rekrutamentu ba bolsu estudu ne’e, fo liu oportunidade ba estudante ne’ebe iha are rurais tanba sira identifika ona iha area remota mak presiza tebes rekursu umanu, liu-liu parteira no emfermeiru/a.
Iha parte seluk Membru Komisaun F ne’ebe trata asuntu Saúde no Edukasaun iha Parlamentu Nasional, Deputada Ilda Maria da Conçeicão hateten, planu ne’e tarde ona tanba mandatu governu ida atu reamata ona.
“Hau hanoin tempu ne’e badak liu ona atu sira implementa sira nia planu, atu fo bolsa estudu ba ita nia estudante sira hodi estuda iha universidade iha Kupang, ba area parteira hodi kobre ita nia area remotas sira,” dehan Deputada da Conceicao.
Deputada ne’e dehan, lolos MS halo planu ida ne’e antes kedas maibe realidade ne’ebe iha hamosu hela deit planu maibe laiha implementasaun to’o ohin loron. *
