Joventude sira iha distritu konkorda ho planu Sekretariiu Estadu Formasaun Profesional e Empregu (SEFOPE) atu loke kursu lian Korea iha Distritu sira, nune’e sira mos bele asesu ba formasaun kapasitasaun ne’e.
“Hau nia hanoin inisiativa ne’e positive tebes tanba ita nia konstituisaun koalia klaru katak lingua ofisial mak lingua Tetun ho Portugues, mas lingua trabalho mak lingua hotu ne’ebe iha,” dehan joventude Romeo Verdial, semana kotuk (12/04) iha Parlamentu Nasional nia oin.
Tuir Joventude Verdial, lingua sai hanesan meus komunikasaun hodi fasilita servisu iha rai laran no rai liur, tanba realidade hatudu ona joventude feto no mane lubuk ida ne’ebe mak hala’o servisu iha Korea de Sul ho sistema organizadu.
Planu formasaun ida ne’e hanesan meius ida atu redus numeru dezempregu iha rai laran, e mos atu kapasita joventude sira ne’ebe durante ne’e la hetan formasaun, sira bele tuuir formasaun ne’e, nune’e bele involve aan iha merkadu trabalhu.
“Hau hanoin inisiativa SEFOPE nian ne’e positive tebes atu redus numeru dezempregu iha rai laran nune’e mos atu kapasita joventude sira ne’ebe laiha kbi’it atu tuir formasaun iha capital, atu bele involve an iha merkado de trabalhu,” dehan Deputada Jacinta Abucau Pereira ,nudar Membru Komisaun H Parlamentar, ne’ebe trata asuntu Joventude, Desportu e Formasaun Professional.
Deputada ne’e hatutan, formasaun professional ne’ebe SEFOPE fo ba joventude sira durante ne’e, hatudu duni progresu ne’ebe diak maske la barak maibe iha joventude lubuk ida mak hetan ona kampu de servisu hodi investe matenek ne’ebe sira iha instituisaun governu no organizasaun ki’ik sira ne’ebe iha hodi sustenta sira nia moris.
Iha parte seluk Diretor Empregu (SEFOPE), Paulo Alves hateten programa ne’e sei implementa iha Marsu tinan ida ne’e maibe kansela, tanba problema ho fasilidade (kadeira, meja).
“Ami nia planu kada regional ida ita tenke registu joventude hamutuk 200, tanba ne’e mak ita prepara meja no kadeira atu bele hala’o formasaun ne’e,” dehan Diretor Alves.
Maibe tuir Diretor Alves, iha tempu badak bele ona implementa, nune’e bele atinji numeru trabalhador Timor oan ne’ebe governu Korea husu, e iha tinan ida ne’e hamutuk 3500 trabalhadores.
No sira sei hala’o ezame iha fulan Outubru formadu sira husi distritu mos bele tuir hotu dehan Diretor Alves.*
