Ekipa susesu no militante Kandidatu Prezidenti da Republika Francisco Guteres ‘Lu-Olo’ hateten sira prontu atu suporta Kandidatu Lu-Olo ba Prezidenti da Republika iha eleisaun segunda ronda tanba Lu-Olo iha esperiensia halo lei iha primeiru legislatura nian iha Governu anterior nian, e nia mak hametin demokrasia no unidade nasional.
“Lu-olo mak lidera primeira legislature halo konstituisaun ba rai ida ne’e,” hateten Ozorio Mauleki Sekretariu Jeral Partidu Demokratika Republika Timor (PDRT) nebe hamutuk ho Bloku Proklamador atual sai ekipa susesu ba Kandidatu Lu-Olo iha kampanha FRETILIN iha Kampu Futebol Don Bosco Comoro Dili foin lalais (13/04).
Ekipa susesu Mauleki, dehan Lu-Olo mak lidera FRETILIN iha primeira Governasaun halo lei kona ba fo subsidiu ba ferik no katuas sira.
“Hau esperansa katak , povu iha rai ida ne’e sei vota ba Lu-Olo hodi manan iha eleisaun no sai Prezidenti da Republika ba rai ida ne’e,” Mauleki esperansa.
Mauleki observa katak, durante kaer ukun hahu husi Xefe Estadu primeiru Xanana Gusmao to’o iha Ramos Horta, sira ladun ezerse sira nia funsaun nudar Prezidente tanba korupsaun kontinua buras. “Dezenvolvimentu la la’o,” Mauleki kritika.
Ekipa susesu ne’e dehan bainhira Lu-Olo sai prezidente nia sei redus korupsaun no nepotismu iha rai laran.
Entertantu Mililitante ba kandidatu Lu-Olo, Jose Camoes informa katak wainhira Lu-Olo eleitu kaer pasta prezidenti da republika nia sei defende rai no demokrasia iha rai ida ne’e.
“Ami nudar militante FRETILIN garante katak nia tenki sai prezidenti para atu lori nasaun ne’e ba oin, hakuak povu tomak no sei la akontese tan lorosa’e no loromonu,” Militante Camoes esperansa.
Iha fatin hanesan Militante Kandidatu Lu-Olo, Lucia Amaral Henrique hateten, Lu-Olo tenki manan no sai prezidenti da republika, nune’e bele tau matan ba ferik, katuas no faluk oan kiak sira tanba barak mak sei moris iha kiak nia laran.
“Durante ne’e ami ba husu Governu, maibe Governu taka dalan ba ami faluk oan kiak no ferik katuas sira,” militante Henrique tenik.
Nia sujere ba kandidatu Prejidenti Lu-Olo wainhira eleitu sai prezidenti da republika tenki taumatan ba faluk oan kiak no ferik katuas sira iha Timor laran tomak.
“Ami pronto para atu dudu kamarada Lu-Olo sai prezidenti da republika tanba ami feto sira pronto atu suporta nia,” militante Henrique haktuir tan.
